Депресивниот детектив Евгениј МекКваклин се враќа во нова авантура со наслов Duck Detective: The Ghost of Glamping. Самостојно продолжение на успешниот The Secret Salami ве води далеку од канцелариските сплетки, директно во природата – или поточно, во луксузен камп се чини дека е опседнат со духови.
Последиците од разводот и зависноста од леб и понатаму оставаат трајни белези на измачениот детектив кој, за да бидат работите уште покомплицирани, сега е вовлечен во нова мистерија. Она што требаше да биде релаксирачко бегство брзо се претвора во истрага исполнета со сомнителни ликови каде секој крие по некоја тајна.
Duck Detective: The Ghost of Glamping ја задржува шармантната формула на својот претходник, но со сепак успева да се истакне со забележителни подобрувања. Гејмплејот се заснова на истражување на околината и интервјуирање на осомничените за да се соберат клучни зборови. Овие зборови потоа се користат за пополнување на празнините во вашите заклучоци, слично на пополнување реченици.
Загатките се забавни и логични, а новите додатоци како анализа на ракопис и едноставно дешифрирање кодови успеваат да внесат уникатна свежина за време на играњето. Duck Detective: The Ghost of Glamping никако не сака да ви здосади и, поради тоа, се работи за релативно кратко искуство, со времетраење од околу 2 до 3 часа. Како резултат имате задоволително и поопуштено искуство без непотребно развлекување.
Графичкиот стил потсетува на Paper Mario, со ликови кои се дизајнирани како хартиени фигури кои се движат низ 3D простор, давајќи ѝ на играта посебен, неодоливо сладок шарм. Гласовната глума е извонредна и успева да му даде живот на секој лик. Паралелно со ова, џез музика инспирирана од ноар филмовите, совршено ја надополнува атмосферата.
Duck Detective: The Ghost of Glamping е прекрасно спакувана мистерија која успева да биде и смешна и интригантна. Ако сте љубител на cozy мистерии и сакате кратка, но квалитетна авантура која ем ќе ве насмее ем ќе ве натера да размислувате, ова е истрага во која дефинитивно треба да навлезете.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
