Super Meat Boy беше првиот таканаречен Precision Platformer кој не излуди со предизвикувачките мапи и потребата за внимателно планирање, огромна прецизност и темпирање на движењето. Исфрустрирани од константното убивање и немање желба за понатамошно мазохистичко мачење, долго време не пипнавме слични игри. Planet Cube: Edge мислевме дека ќе биде малку поразлична игра и не до тој степен предизвикувачка како Super Meat Boy. Од графички аспект и презентација, разликата е очигледна, но од поглед на нивото на предизвик и вештините кои се бараат, игриве се како близнаци.
Planet Cube: Edge почнува крајно едноставно. Играјќи како релативно несмасна коцка, потребно е првин да му побегнете на тенкот кој ве прогонува, а потоа и да го спасите светот, користејќи едноставни движења за патување од една до друга точка. Но, патот е исполнет со бројни замки и непредвидливи непријатели, при што бргу заклучувате дека авантурата воопшто нема да биде лесна. За среќа, вашиот арсенал од движења ќе биде проширен со можност за кратка телепортација, а и ќе добиете огнени експериментални оружја за поефикасна пресметка со непријателите и за активирање одредени направи.
Од тука натаму, Planet Cube: Edge се трансформира во еден хаотичен коктел од налудничаво трчање, скокање и телепортирање низ сино-зеленикава лепеза од рачно изработени мапи со ретро инспирирани анимации и ефекти. Бидете подготвени да умирате често затоа што мапите се апсолутно безмилосни и одредени патишта ќе ги поминувате одново и одново, дури и долго откако ќе ги запомните пречките. Без брзи рефлекси, тапкање во место е загарантирано. За среќа, времето од умирањето до повторно започнување е релативно брзо и ако по илјадити пат не успеете, можете да пробате одново. И одново! :) Убавината на ваквите игри е токму во предизвикот и константното пробување се додека не се надминете самите себеси.
Во Planet Cube: Edge на располагање имате осум преубави мапи полни со интересни, но површни ликови. Силната страна дефинитивно не е приказната и еднаш штом започне флуидноста на движењето нема да сакате да бидете деконцентрирани со ништо друго. Како дополнителна помош е музичката подлога која значително допринесува до зголемување на адреналинот и одлично се вклопува со движењата и напредувањето низ мапите. За уште поголем предизвик и разбивање на секоја можна монотонија, ќе се соочите и со четири уникатни босови кои дополнително ќе ги тестираат вашите способности.
Доколку одамна не сте ги тестирале вашите рефлекси во преубава околина со уникатна лепеза од движења и непредвидливи замки и непријатели, тогаш Planet Cube: Edge е игра која би требало да ја проверите. Моментно, на Steam има 42 рецензии од кои сите се позитивни. Какво ќе биде вашето искуство?
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
