Компанијата „Некстсенс ДОО“ го има најдоброто решение и ова решение е прворангирано на јавниот повик за финансирање на проект за изработка на информациски систем за управување во областа на патничкиот и товарниот сообраќај финансирано од Фонд за иновации и технолошки развој (ФИТР). Покрај ФИТР повикот е и во организација на Министерството за транспорт и врски на Република Македонија.
Решението овозможува интероперабилност со системите на другите институции. Со ова ќе се олесни размената на податоци помеѓу институции. Дел од проектот e и креирање на Централен регистар на транспортери со информации за сите типови на транспортни компании, според нивните податоци и дејноста.
„Проектот – ПристАпп Информациски систем за управување во областа на патничкиот и товарниот сообраќај – ќе овозможи стандардизација и дигитализација на секторите поврзани со превоз на стока и патници. Целта на новото софтверско решение е да обезбеди поефикасен и потранспарентен процес на издавање на различни видови на дозволи и документи за да се зголеми ефикасноста и работата на Министерството за транспорт и врски и да се понудат поквалитетни услуги во секторот транспорт.
Новиот систем ги опфаќа сите фази од постапката од електронското аплицирање во патничкиот линиски превоз, како и транспортот на стока, предвидени со Законот за превоз во патничкиот сообраќај, управување на постапките за одобрување решенија, па сѐ до издавање на лиценците и дозволите“, велат од Фондот.
Проектот на Некстсенс ќе придонесе и за помали трошоци за софтвер и за одржување на софтверот. Проценката е дека овие трошоци ќе се намалат за 52% со новиот систем.
Проектот ќе трае девет месеци, а износот на доделениот грант од страна на ФИТР е 4,522,722.00 денари.
