Можеби веќе забележавте. Одите на вашиот омилен форум на Reddit, а таму ве пречекува порака дека е затворена заедница. Илјадници форуми, во знак на протест ќе бидат затворени од 12-ти до 14-ти јуни поради API промените кои ги најави платформата.
На протестот се приклучија и некои од најголемите форуми со милиони членови. R/Gaming (над 32 милиони членови), R/music (29 милиони членови), R/todayilearned (26.5 милиони), R/funny (37,5 милиони членови) ги затворија своите „sub Reddits“. Наместо содржина до корисникот доаѓа соопштение дека се дел од координираниот протест предизвикан од неразумната промена на цената. Процената е дека над 7000 подредити ќе бидат недостапни барем во следните 48 часа.
Модераторите на Reddit се чини дека разбираат дека за пристап до API-то на Reddit ќе мора да се плати. Сепак не се согласуваат со висината на цената. Reddit овие промени ги претстави на 1-ви јуни, а ќе бидат активни од 1-ви јули.
Крај за апликации од трети страни
Сѐ започна со најавата за промени и плаќањето за пристап до API-то на Reddit. Причината за протестот не е за најавената претплата за API, туку за висината на оваа претплата. Некои од девелоперите излегоа со проценка на цената и навистина цените се огромни. Развивачот на апликацијата Apollo Кристијан Селиг преку пост на Reddit сподели информации како промената ќе влијае на апликацијата. По промената секој месец за API повици до Reddit ќе треба да плати 1,7 милиони американски долари. Годишно оваа сума ќе изнесува 20 милиони долари.
Секој корисник на Apollo во просек во текот на денот прави 344 повици или 10,6 илјади повици месечно. Со најавените промени за плаќање просечниот корисник ќе ја чини платформата 2,5 долари месечно. Месечната претплата за апликацијата e 1,49 долари, па дури и за претплатниците апликацијата ќе работи со загуби. Поради промени Apollo, но и Reddit is Fun, Sync и ReddPlanet ќе престанат да функционираат. Овие апликации овозможуваа пристап до содржините на Reddit на мобилни уреди преку алтернатива на официјалната апликација.
Претставникот на Reddit објасни дека цената е толку висока за Apollo бидејќи апликацијата е неефикасна со повиците.
До кога ќе трае протестот на Reddit
Протестот треба да трае 48 часа. Сепак секој „sub Reddit“ има сопствени модератори кои независно од останатите ја креираат својата „политика“. Засега нема единствен глас кој говори за сите кои се приклучија на протестот. Некои ќе продолжат со нормална работа за 48 часа, а некои како r/music и r/videos најавија дека ќе останат непристапни се додека не се направат промени.
Покрај цената некои од учесниците во протестот имаат и други барања: подобрување на пристапот за луѓето со оштетен вид и креирање на еднаков пристап до NSFW содржина. Последното се однесува на ист пристап на овие содржини и за апликациите од трети страни и за Reddit. Ако некоја содржина е достапна на сајтот, истата да биде видлива и во овие апликации.
Според последната објавена бројка на r/ModCoord на протестот се приклучиле 7266 подредити и 28176 модератори. Вкупниот број на корисници зафатени е 2,617,191,114. Бројката на корисници е огромна, но се бројат како уникатни сите корисници во подредити.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
