Првите Ubuntu телефони ќе започнат да се продаваат во Европа веќе оваа недела. Телефоните Aquaris E4.5 Ubuntu Edition ќе бидат достапни преку BQ и ќе чинат 170 евра. За почеток се наменети за ентузијастите, а лоша вест за сите кои се надеваа на PC-хибрид e што првите телефони нема да станат PC доколку се приклучат на монитор, што беше дел од првите предлози.
„Издавањето на првиот Ubuntu паметен телефон е значаен настан. Новите искуства кои им ги овозможуваме на корисниците како и можноста за диференцијација помеѓу производителите и операторите се привлечна и потребна промена од она што е достапно денес“, вели Џејн Силбер директор на Canonical.
Aquaris E4.5 доаѓа со 4.5-инчен екран со резолуција 540х960, четири-јадрен Cortex A7 процесор на 1.3GHz од MediaTek,1GB RAM, 8GB слободен простор и можност за негово проширување со два microSD слота, 8МР предна и 5МР задна камера. Тоа што можеби е најинтересно е начинот на продажба, која изгледа позајмена од Xiaomi кој своите нови телефони ги продава во кратки „флеш продажби“ кои траат само одреден краток период. Дали ова ќе продолжи и во иднина за сега е непознато, но можеби со поголема популарност на телефонот, ќе започне и регуларната продажба. Што се однесува до апликациите заедно со Aquaris E4.5 ќе доаѓаат Facebook, Twitter, Amazon, Time Out, Yelp, a Spotify, SoundCloud и Grooveshark се интегрирану преку нивните web API. Апликациите за Ubuntu телефоните ќе можат да бидат HTML5 или QML.
