YouTube и Google Play најавуваат огромен чекор напред за видео сервисот. Голем број на популарни серии и филмови, меѓу кои и Prometheus и Family Guy, ќе бидат додадени на YouTube каналот. Оваа недела, по завршувањето на преговорите со Twentieth Century Fox TV, YouTube има право да изнајмува филмови од шестте најголеми филмски студија.
„Google Play и YouTube ги нудат најновите филмски изданија и омилени ТВ емисии на вашиот Android телефони или таблет комјутер преку интернет. Но ни недостасуваше еден критичен лик … Stewie Griffin. Среќни сме да објавиме дека Stewie “Family Guy” и повеќе од 600 други наслови од Twentieth Century Fox наскоро ќе се приклучат на каталогот за изнајмување или купување на Google Play и YouTube“, јавува Џонатан Зеп на официјалниот блог на Google.
Според најавата на Google пристигаат филмови како: X-Man, Ice Age и Black Swan, но и сериите: Modern Family, New Girl, Family Guy и Glee. Најголем ексклузивитет е пристигањето на Prometheus, кој ќе биде достапен на YouTube три недели пред излегувањето на неговото DVD издание.
Ова е добра вест и за корисниците на Android телефони и таблет компјутери кои ќе добијат повеќе нови содржини (филмови и серии), иако услугата е ограничена од квалитетот на мрежата. Но, со новата 4G, односно LTE мрежа не би требала да имаат проблеми.
Иако цената за изнајмување или купување на филмови не е објавена, порталот Mashable јавува дека вообичаено изнајмувањето чини помеѓу 3 и 4 долари. Единствено ограничување е по изнајмувањето на филмот корисниците можат да го гледаат во наредните 30 дена, а мора да завршат со гледање 48 часа одкако започнале да го следат филмот. Најголем број од филмовите се достапни и за продажба со цена помеѓу 10 и 15 долари.
За жал, сега за сега овие филмови ќе бидат достапни само во САД, а потоа ќе бидат пуштани и во останатите земји. Во меѓувреме можете да ги прегледате сите боливудски наслови и постари филмови кои беа додадени на YouTube пред некоја година и кои се достапни во земјава.
