Кога убаво ви се „скоцкани“ фајловите, секој во посебен фолдер и подфолдер, пристапот до нив знае да биде безболен. Но, таквото нешто се чини дека е точно само кога се работи за помал број фајлови. Во моментот кога ќе влезат во игра и екстерни хард дискови и складирање на облаци, ситуацијата знае да биде исклучително похаотична. Самиот Windows оперативен систем има солидни можности за пребарување, но е далеку од семоќен. Поради тоа, можеби и не е лошо да се запознаете со потенцијалите на една алатка на далеку познатите NirSoft.
SearchMyFiles се одликува со напредни можности за пребарување и активирање корисни параметри. Со неа, можете да го листате пребараното во зависност од времето кога е креирано, менувано или во зависност од тоа кога е пристапувано. Може да пребарувате според вид на фајловите, како и нивната големина.
Она што нам најмногу нѝ се допаѓа во најновата, трета верзија е тоа што конечно можете да пребарувате и според текст кој е напишан внатре во текстуални документи, како office, или PDF документи. Исклучително корисна опција за релативно брзо наоѓање на она што го барате.
