Армијата на САД сака да креира нов лесен тенк кој ќе биде фокусиран на мобилност, брзина и на нови технологии. Проектот произлегува од DARPA и е наречен Ground X-Vehicle Technology (GXV-T), пишува BBC. Наместо како и досега да го заштитува возилото со зголемување на оклопот, DARPA работи на зголемување на можностите за избегнување на проектилите.
Трендот за потешки, помалку мобилни и поскапи борбени платформи ги ограничува војниците и маринците во нивните можности за брзо распоредување и маневар на боиштето, и остварување на нивните мисии во различна околина и опасност. Поважно поголемите возила се ограничени на патишта, и имаат потреба од повеќе логистика и се поскапи да се дизајнираат, развијат и произведат.
Проектот засега е во почетна фаза и DARPA ги прибира идејните решенија. Новиот тенк треба да биде помал и полесен за половина од денешните тенкови, а потребно е и намалување на персоналот за половина. За сметка на ова тенкот на иднината треба да биде двапати побрз, ќе мора да може да премине преку 95 отсто од пределите, а технологијата која ќе биде инсталирана во возилото ќе треба да ја намали можноста на непријателските единици да го детектираат и да го нападнат тенкот. Избегнувањето на опасностите тенкот ќе треба да ги прави автономно преку нивно избегнување, но и репозиционирање на оклопот. Автономното избегнување претпоставува и дека тенкот на иднината ќе му асистира на возачот. Во DARPA се надеваат дека ќе можат да започнат со развојот на технологијата пред почетокот на април следната година.
