Oд трите викинзи до Diablo и WoW, кратка историја на Blizzard Entertainment

Пред дваесет години, три штотуку дипломирани студенти на UCLA решиja да отворат своја компанија за видео игри. Нивната цел беше да прават добри видео игри и да се забавуваат додека го работат тоа што го сакаат. Компанијата е основана под името Silicon & Synapse од основачите Мајкл Морхајм, Ален Адам и Френк Пирс кои во почетокот работат на адаптација на видео игри од други комании. Во адаптираните игри кои ги изработиле спаѓаат Battle Chess II: Chinese Chess, Castles и The Lord of the Rings, Vol I на Толкин.

Во 1992 и 1993 година ги издадоа своите први игри – Lost Vikings и Rock and Roll Racing. Lost Vikings е логичка аркадна игра во која играчите ги контролираат Eric the Swift, Baelog the Fierce и Olaf the Stout. Тројцата имаат различни моќи кои играчот треба да ги искористи за да ги реши загатките и да ги спаси од рацете на нивниот киднапер Tomator. Тројцата Викинзи се едни од омилените ликови на дизајнерите во Blizzard и можеби сте ги забележале и во некои понови наслови.

Во 1994 година издавачот Davidson & Associates ја купува компанијата и на кратко го менуваат името во Chaos Studios, пред да се прекрстат во Blizzard Entertainment, име под кое го освоија гејмерскиот свет. Истата година излегува и првиот дел од Warcraft серијалот Warcraft: Orcs and Humans. Играта е една од првите RTS игри (прва стратегија во реално време е Dune 2), и заедно со нивниот главен конкурент во тоа време Command & Conquer го популаризираа овој жанр. Warcraft: Orcs and Humans е најдобро прифатената игра на Blizzard до тогаш, и е игра која го означи почетокот на финансиската сигурност на компанијата.

Набрзо следеа и Warcraft II: Tides of Darknes и експанзијата Warcraft II: Beyond the Dark Portal кои ја продолжија приказната од претходниот дел. Серијалот на Warcraft стратегии го завршуваат Warcraft III: Reign of Chaos и Warcraft III: The Frozen Throne. Една од новостите која ја донесе Warcraft III се хероите, единици кој се појаки од останатите и добиваат искуство. Ова донесе RPG (играње на улоги) елемент во серијалот и направи подлога за можеби најдобриот MMO (масовна мултиплеерн онлајн игра) во моментов World of Warcraft.

Сепак ова не беше прв пат Blizzard да се пробаат во RPG жанрот. Во 1996 година ја издадоа Diablo. Играта е огромен хит и е добитник на GOTY (игра на годината) за 1996 година. Целата игра е сместена во селцето Tristram, во чија катедралата се наоѓаат скали кои водат до самиот Пекол. Низ шестнаесет нивоа играчот се спушта со цел да го победи Diablo, повремено завршувајќи мисии за мештаните. Приказната за безимениот херој продолжува во Diablo II и Diablo II: Lord of Destruction. Играта е рекордно продавана во 2000 година со повеќе од 1.000.000 продадени копии за една недела. Во 2008, седум години по излегувањето на играта Diablo II сè уште е на 19 место според продажбата на PC-игри.

Во 1998 година Blizzard почна да го издава својот втор серијал на стратегии Starcraft. За разлика од Warcraft овдека играта е сместена во подалечна иднина, а приказната е главно за војните и односите помеѓу трите доминантни фракции луѓе, инсектоид и- Zerg и понапредна раса- Protos.

Тројцата викинзи се појавуваат и во World of Warcraft

Најголем хит на Blizzard секако е World of Warcraft, ММО поставена во светот кој почнаа да го презентираат 10 години пред издавањето оваа игра. Со над 11,1 милиони играчи кои играат WoW секако е најуспешната онлајн игра до сега. Играта е во својата четврта експанзија и веќе одамна ги надмина рамките на оригиналниот универзум поставен од Warcraft: Orcs and Man.

WoW e најпродаваната игра за 2005 и 2006 година за PC и според пресметките има 62% од вкупната популација на MMORPG со претплата.

По дваесет години и повеќе хит игри, јасно е дека тројцата студенти успеале во својата намера, не знам дали се забавуваат, ама секако прават едни од најдобрите игри денес и можеби и во иднина. Во исчекување сме на Diablo 3 и на новиот MMO проект Тitan.