Од гигант до пропаст, BlackBerry ги продаде патентите за телефони, пораки и безжични мрежи

Канадската компанија BlackBerry која во минатото беше во самиот врв на производители на паметни телефони во целост се повлекува од пазарот. Откако минатиот месец заврши поддршката за телефоните, минатата недела за 600 милиони долари го продадоа и патент портфолиото. Купувач на патентите е „Catapult IP Innovations Inc.“, а патентите се однесуваат на мобилни уреди, пораки и безжични мрежи.

Новиот сопственик на патентите Catapult IP Innovations Inc. е новооснована компанија со седиште во Делавер со единствена цел, да го купи патент портфолиото. За купување на патентите компанијата зема заем од 450 милиони долари. Оваа сума веќе е префрлена кај BlackBerry, а исплатата на преостанатите 150 милиони долари ќе започне за 3 години.

Портфолиото на BlackBerry има над 38000 патенти. Веројатно за да започне да враќа дел парите кои ги инвестираше во патентите, Catapult IP Innovations Inc. наскоро ќе започне со тужби за злоупотреба на патенти. BlackBerry и самите се познати по тужби за интелектуална сопственост, во 2018 поднесоа тужба против Facebook Messenger за нарушување на интелектуална сопственост.

Blackberry беше еден од најпосакуваните телефони

Продажбата на патентите за мобилни уреди, пораки, и безжични мрежи е само конечен крај за телефонијата на BlackBerry. Ова беше подолг процес кој започна во 2007 година со излегувањето на првиот iPhone. Голем дел од производителите како Nokia и Blackberry не се прилагодија на новата реалност, па од најпопуларни уреди во 2007, за неколку години сите ги заборавија. Главна причина за ова не беше дека телефоните на BlackBerry не поддржуваа апликации, туку дека не успеаја навреме да се прилагодат на „попаметните“ телефони. Како и Nokia, и BlackBerry трошеше премногу време на развој на оперативен систем пред да се префрли на Android. На крај, не можеа да се натпреваруваат ниту со iOS, ниту со Android.

blackberry phones
By Kt38138 – Own work, CC BY-SA 4.0, https://commons.wikimedia.org/w/index.php?curid=46699162

BlackBerry официјално започна да постои на 19 јануари 1999 година со првиот BlackBerry брендиран пејџер, но целата приказна започна петнаесетина години порано. Во 1984 година Мајл Лазаридис и Даг Фрегин, во Ватерло, Онтарио ја основаа компанијата Research In Motion (RIM). Првите неколку години работеа на пејџери кои ги издаваа под името „[email protected] Pager“. Првиот уред под брендот BlackBerry излезе 1999 година, BlackBerry 850. Ова беше прв ваков уред со интегриран имејл. Благодарение на фокусот на електронската пошта, брендот започна да привлекува многу корисници.

Во 2002 година BlackBerry го издаде и својот прв телефон. Серијата 6000 беше дел од првите уреди кои беа пејџери со интегриран телефон. Доаѓаше со во тоа време голем монохроматски екран со резолуција 160х160px. Во овој период уредите кои доаѓаат со телефон, имејл и интернет беа нарекувани „паметни телефони“.

Популарноста доаѓаше од можностите на телефонот да се спојат телефонските повици, имејл и каква-таква веб функционалност. Дизајнот на најголем дел од Blackberry-телефоните не се разликуваше премногу. Креираа уреди со физичка тастатура, кои и денес се лесно препознатливи. Токму „инатењето“ да се задржи физичка тастатура по секоја цена беше уште една од причините за падот.

Најважниот момент за компанијата дојде во 2007 година, и најавата на првиот iPhone. Стив Џобс во најавата имаше краток осврт за телефоните на конкуренцијата, и еден од нив беше и Blackberry. До излегувањето на iPhone, Blackberry беше омилениот телефон за деловните корисници.

Една година по iPhone, RIM се обиде да се спротивстави и го претстави својот прв телефон без физички копчиња – BlackBerry Storm. За жал уредот беше лош и имаше толку багови што авторите на книгата „Losing the Signal: The Untold Story Behind the Extraordinary Rise and Spectacular Fall of BlackBerry“ го прогласија за најголема катастрофа во историјата на паметните телефони.

Бројот на корисници на BlackBerry сепак продолжи да расте до 2013. Причината за растот сепак беше поради растот на целиот сектор. Компанијата по излегувањето на iOS и Android уредите иако добиваше нови корисници го губеше својот удел на пазарот. Во 2016 BlackBerry во целост се повлече од пазарот на паметни телефони и се префрли на софтвер и на деловни услуги.

Од јануари 2022 официјално заврши и поддршката за сите BlackBerry телефони.

BlackBerry 850

BlackBerry 850 / BlackBerry 950 by Ruben de Rijcke – Own work, CC BY-SA 4.0, https://commons.wikimedia.org/w/index.php?curid=77870601

Овој уред е првиот кој излезе под BlackBerry брендот. Излезе на 19 јануари 1999 година и беше првиот кој доаѓаше со имејл интеграција. Уредите имаа поддршка за DataTAC мрежа.

BlackBerry 5820

Првиот паметен телефон на компанијата кој на пејџерот му додаде телефон со што дополнително да ја прошири функционалноста, излезе во 2002 година. BlackBerry 5820 беше важен уред за еволуцијата на BlackBerry. Телефонот доаѓаше со имејл, текст пораки, интернет факс, и можност за прелистување на интернет.

BlackBerry Bold 9000

Во 2008 година BlackBerry ја издаде 9000 серијата. Телефонот се одликуваше со физичка тастатура и „trackball“. Ова беше полуксузен модел, а тоа се познаваше и од материјалите од кои беше изработен: кожа, метал, јаглеродни влакна. Првиот модел имаше 2,6-инчен екран; процесор на 624MHz; 1GB слободен простор и 128MB RAM.

Добивај известувања
Извести ме за
guest
0 Коментари
Inline Feedbacks
View all comments