Според најновите доверливи документи кои ги достави поранешниот аналитичар на CIA, Едвард Сноуден, до Der Spiegel, Националната агенција за безбедност на САД (NSA) го хакирале комуникацискиот канал на Аl Jazeera. Ова е уште еден интернационален инцидент во кој е вклучена NSA. Претходно од тајните документи кои ги објави г. Сноуден, се дозна дека NSA ги прислушувала и Обединетите нации и Европската Унија.
Причината поради која тие ја следеле внатрешната комуникација на Аl Jazeera не е позната, но се вели дека од агенцијата пристапиле до комуникациите со неколку „интересни цели“. Aрапската телевизија Аl Jazeera е позната по своето објавувањето на аудио и видео пораките од Алкаеда за повеќе од 10 години, како и на интензивно покривање на настаните од Арапската пролет кои се случија во неколку земји во Блискиот Исток
Во еден од документите кој датува од 23 март, 2006 година, се вели дека шпионажата била успешна, но не укажува точно кои информации биле добиени од изворите на Аl Jazeera. Не е познато дали вработените, новинарите или менаџерите на медиумот биле шпионирани, но во извештајот се вели дека доколку информациите биле енкриптирани, тогаш тие биле доставани во седиштето на NSA за да бидат декриптирани.
