Новиот Pixel 6 ќе користи процесор на Google

Со години уназад, смартфоните на Google користеа процесори произведени од Qualcomm. Како што тврдат од 9to5google, оваа година, новиот Pixel 6 ќе користи процесор изработен од Google.

Чипот за кој што се работи е познат како GS101 Whitechapel, а шпекулации околу истиот се појавија уште минатата година, кога извршниот директор на Google, Sundar Pichai, најави дека од компанијата ќе инвестираат посериозно во хардвер, и дека имаат интересни планови за 2021.

Самите чипови се труд од страна на Google да добијат поголема контрола врз нивните уреди, како што е случајот со Apple. Кај Apple е очигледно дека софтвер-хардвер интеграцијата е една од најбитните придобивки од нивните уреди, а по се изгледа, и Google се стреми накај истото. Процесорите се наменети не само за смартфони, туку и за Pixel Chromebook уреди.

Развитокот на процесорите е во соработка со Samsung, поконкретно со нивната SLSI (system large-scale integration) дивизија. Според ова, голема е можноста Whitechapel процесорите да имаат некои сличности со Exynos процесорите кои Samsung ги користат и развиваат со години. Постои можност и Samsung да се одговорни за самото производство, но нема поконкретни информации за ова.

Што знаеме за хардверот?

Засега не се познати никакви хардверски спецификации, освен фактот дека веројатно се работи за 8-јадрен ARM чип, и дека процесорот ќе доаѓа со оптимизации за одредени задачи. Нешто слично на ова видовме и со Pixel Visual Core кај Pixel 2, кој значително го убрза процесирањето на фотографии, како и кај Pixel 4 и 4 XL, со Pixel Neural Core. Тука е и секако Titan M, безбедносен чип кој помага со енкрипција и чување на биометрички податоци. Со процесор кој е нивно сопствено производство, од Google потенцијално би можеле сите вакви придобивки да ги искомбинираат во еден чип.

За жал, кога станува збор за перформансите, се чини тешко дека процесорите на Google ќе се на исто ниво со врвните процесори на Qualcomm. Не само што Qualcomm имаат многу години искуство во индустријата, туку и фактот што Whitechapel е соработка со Samsung не влева многу доверба – Exynos процесорите неретко се полоша варијанта од Snapdragon моделите во еквивалентните уреди.

Дали има и други придобивки?

Веројатно најголемиот бенефит од целата ситуација ќе е софтверската поддршка за уредите на Google. Иако пред некоја година компанијата беше подобра од сите други конкуренти во Android светот, во моментов доцнат позади Samsung бидејќи нудат една година помалку безбедносни надградби. Останува да се надеваме дека фактот што ќе добијат подобра контрола врз хардверот, ќе значи и подолготрајни надградби на софтверот.

Првите уреди кои ќе дојдат со овој процесор се внатрешно познати како Raven и Oriole, уреди кои најверојатно ќе бидат пуштени во продажба оваа есен, а едниот од нив би требало да е новиот Pixel 6.  

Благодарност за информацијата до gdamjan, кој ја сподели на IT.mk форумот.

Добивај известувања
Извести ме за
guest
0 Коментари
Inline Feedbacks
View all comments
види ги сите огласи на kariera.it.mk