No Mario’s Sky e пародичен спој на No Man’s Sky и Super Mario. Симпатичната игра ве става во контрола на Марио и ви дозволува да го правите она што Марио го прави најдобро, се додека не навлезете во вселенско летало и не одлетате на некоја друга планета. А таму, наместо да откривате нови животни, скокате на малку поразлични goomba суштества.
No Mario’s Sky е развиена од ASMB Games и тоа за време на 72 часовниот гејм џем Ludum Dare 36. Играта е достапна за PC, Mac и Linux, а можете и бесплатно да ја преземете од продавницата за инди игри Itch.io.
Доколку сте барем малку заинтересирани за ваквиот хибрид, ви препорачуваме да се забавите со играта во најскор можен рок. Воопшто не би биле изненадени Nintendo да работи на случајот играта да биде отстранета. Така беше со римејкот на игрите Pokemon Uranium и Metroid 2 и не гледаме причина зошто би било поразлично со No Mario’s Sky. Имено, креаторите на Pokemon Uranium директно беа контактирани од адвокатите на Nintendo, а во случајот со Metroid 2 римејкот се одеше со DMCA (Digital Millennium Copyright Act) одстранување. Интересно е како и покрај сево ова, уште една игра се реши да пркоси на Nintendo.
Како и да е, претпоставуваме дека за Супер Марио знаете се што треба да се знае, а доколку сакате да прочитате за нашето мислење за No Man’s Sky упатете се тука!