Веќе подолго време кружат гласини и претпоставки за тоа дека PSVR помалку (или воопшто) нема да биде поддржан од најновата конзола на Sony. Првото црвено знаме го забележавме откако слушнавме дека најновата PlayStation 5 HD камера нема да функкционира со PlayStation VR headset. Набргу по тоа забележавме дека никаде во промо материјалот за PS5 верзијата на Hitman 3 не стои поддршката за PSVR.
Во меѓувреме, UploadVR добија потврда од Sony дека PS5 верзиите на игрите со PSVR нема да бидат поддржани од VR шлемот и дека доколку сакаме да ги играме игрите како Hitman 3 или No Man’s Sky во VR, ќе мораме да ги купиме PS4 верзиите, а не тие за PS5. Претставникот за Sony дополнително објасни дека ниедна PS5 игра не најавила дека ќе има поддршка за VR, што значи дека таквото нешто се чини дека е ексклузивно за PS4.
Како огромни фанови на VR технологијата, длабоко сме разочарани, но некако не веруваме дека Sony планира да остане на ова на подолгиот период. Се надеваме дека година-две по лансирањето на конзолата би можеле да видиме и некоја втора верзија на PSVR и посоодветна опрема за неа.
