Младински образовен форум и Радиo МОФ го најавија седмото издание на Engage. Станува збор за еден од најголемите, ако не и најголем настан чиј фокус е друштвениот активизам.
Откако неколку пати се одржа во МКЦ, настанот се пресели во Култура, а оваа година ќе се одржи во Музејот на современа уметност. Вообичаено и темите и говорниците се супер интересни, па ова го очекуваме и оваа година. Фокусот оваа година е на: контрола на властите преку технологија; образование; родовата дискриминација; феминизмот; правата на ЛГБТ лицата; независните културни простори; улогата на филмот во општеството; потенцијалот кој се крие во учениците и нивните професори.
Листата на говорници пак е следна:
- Ѓорче Ставрески, режисер на Исцелител
- Алцин Салимовски, директор на ОУ Браќа Рамиз и Хамид и основач на Roma Rock School
- Румена Бужаровска и Ирена Цветковиќ (#СегаКажувам)
- Елтон Баџаку, режисер на Скандал
- Мифони Никсон, mySociety, платформа „They work for you“
- Петар Ниновски (Brainster)
- Арбер Салиху, Термокис
- Андријана Печиновска и Жељко Ненадиќ (OrceTalks)
Дополнително, настап ќе имаат и Roma Rock School и импров групата Настан. Присутните ќе можат да го проследат и филмот Скандал.
Посетата е бесплатна, но со оглед на тоа дека местата се ограничени треба да се регистрирате за настанот. Engage 2018 се одржува на 12 мај, а регистрацијата за настанот е веќе отворена.
