Во обид да ги привлече Gmail корисниците, Microsoft овозможи поддршка на Google Talk четот за текст и аудио директно преку својот имејл клиент Outlook.com. Ова не значи дека конкурентите Google и Microsoft влегоа во соработка, туку само дека Microsoft за додавањето на опцијата го искористи јавниот API.
„Чувме од некои од вас кои се префрлија од Gmail дека сè уште сакате да четувате со пријателите кои се заглавени на Gmail.”, зајадливо вели Microsoft во својот блог пост. „Денес, возбудени сме да најавиме дека ќе може да разговарате со вашите Google пријатели“.
Покрај Google Talk четот кој ќе биде достапен за сите во наредните недели, Outlook.com има поддршка и за повици преку Skype, кој сега е во сопственост на Microsoft. Само овие две опции – да ги занемариме убаво дизајнираниот интерфејс, можност за пристап до повеќе имејл профили и други функционалности – го прават имејл клиентот на Microsoft доста корисна алатка за комуникација. Сервисот од трети мај има над 400 милиони активни корисници, иако повеќето се профили префрлени од изгасениот Hotmail.
Тоа што е интересно е секако посериозното ривалство помеѓу Microsoft и Google за сервиси во облакот. Во моментов Google има предност бидејќи го интегрира Gmail профилот со сите свои сервиси, вклучувајќи ја и својата мобилна платформа Android. Но, Microsoft го има Office 365, кој е далеку подобар од Google Docs, веб складиштето Skydrive, Windows 8 ОС кој се појавува на се повеќе таблет компјутери и Windows Phone платформата која сè уште не е толку популарна како што се очекуваше. Битката за облакот меѓу овие два гиганти само што започна.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
