Студентските денови се едни од најдинамичните, а воедно и најубавите денови на секој студент. Но, кога станува збор за студентскиот живот и студентскиот стандард во Македонија, искуствата и не се баш сјајни.
Покрај стекнувањето на нови знаења, пријателства и искуства. Студентскиот живот носи и многу финансиски трошоци кои што паѓаат на трошок на родителите. Со оглед на факултетските обврски, тешко е да се најде време за дополнителна заработка.
Во овој дел студентската стипендија е најдобрата опција на оние студенти кои што можат да ги исполнат потребните услови.
Во Македонија постојат повеќе типови на студентски стипендии:
- Прва група – стипендии за студенти од социјални категории
- Втора група – стипендии за студенти кои постигнале особено висок успех во учењето
- Трета група – стипендии за студенти запишани на студиски програми од научните подрачја на природно-математичките, техничко-технолошките, биотехничките и/или медицинските науки.
- Четврта група – стипендии за студенти кои се запишани во прва година на студиски програми на високообразовни установи за образование на наставен кадар во предучилишното воспитание, основното и средното образование
Овие типови на стипендии се однесуваат за прв циклус на студии, секако дека има и стипендии за втор и трет циклус на студии.
Она што е заедничко за сите типови е начинот на аплицирање. Додека пак, потребните услови се различни за секоја категорија.
Колку е дигитализиран овој процес?
Најпрвин, процесот на аплицирање започнува кога Министерството за образование и наука ќе го објави конкурсот за доделување стипендии на редовни студенти запишани на додипломски студии од прв циклус на јавните и приватните универзитети и високообразовни установи во Република Северна Македонија.
На сајтот детално се опишани потребните услови, начинот на кој се добиваат стипендиите, целиот процес на аплицирање и потребната документација. Рокот за аплицирање е 2 недели, односно од 01.11.2024 до 15.11.2024 година.
Износот на студентската стипендија за прва, втора, трета и четврта група изнесува 6.050 денари за 9 месеци во текот на студирањето.
Исклучок има во третата група за студентите запишани на студиските програми по хемија, физика, и математика, земјоделските, ветеринарните и шумарските науки. За овие студенти износот е 18.000 денари месечно, во времетраење од 9 месеци.
На сајтот се напишани сите потребни документи за аплицирање, а првиот чекор е собирањето на сите документи.
Некои документи се добиваат електронски, додека пак за други е потребно да се отиде до студентска служба или друга институција, во зависност типот на стипендија и конкретниот документ.
Откако ќе се соберат сите потребни документи, потребна е регистрација на системот http://e-uslugi.mon.gov.mk/ и потоа да аплицирање на конкурсот.
Откако ќе се пополнат личните податоци на кандидатот, се пополнуваат следните барања кои што варираат во зависност од типот на стипендијата. Следниот чекор е прикачување потребните документи и деталите за трансакциската сметка.
По внесувањето на сите потребни документи, финално се кликнува на копчето аплицирај.
Генерално, процесот на аплицирање за студентска стипендија е дигитализиран и откако ќе се соберат сите потребни документи, потребни се дваесетина минути за аплицирање.
Но, треба да се напомене дека и понатаму има голем простор за дигитализирање на процесот на добивањето на одредени документи од надлежните институции.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
