Нови тајни документи кои ги достави поранешниот аналитичар на Американската агенција за национална безбедност (NSA), Едвард Сноуден, oткриваат дека во прислушувањето и следењето на корисниците биле вмешани и канадските власти, покрај американските и британските агенции. Канадските разузнавачи користеле јавни Wi-fi мрежи од аеродромите за да следат илјадници патници дури и неколку дена откако патниците ќе го напуштат терминалот, пренесува CBC.
Канадските власти ги собирале само мета податоците од комуникацијата, односно датумот и локацијата на повиците и имејл, но не била собирана содржина за што се зборувале и за што се пишувало во пораките. Нема информации како канадската агенција (CSEC) ги собирала информациите, ниту од кој аеродром биле собирани.
Според канадските експерти за право, ваквото следење е нелегално, ниту пак може да се најдат причини кои ќе го оправдаат. Во Канада разузнавачките служби можат да собираат информации преку интернационални повици и интернет сообраќај, но им е забрането да ги следат Канаѓаните без судски налог.
