Into the Restless Ruins е интригантна игра која го спојува популарниот roguelike deckbuilder жанр со уникатна механика каде вие самите го создавате лавиринтот низ кој потоа се борите. Наместо да истражувате однапред дефинирани зандани, овде користите карти за да го проширите просторот околу вас. Преку ноќ поставувате соби и ходници, а преку ден се впуштате во автоматска битка низ нив. Вашата цел е да собирате ресурси од изгубените души кои ги населуваат руините, да надградувате шпил со карти и успеете да стигнете до моќниот чувар, The Warden.
Into the Restless Ruins е видеоигра развиена од Ant Workshop Ltd. и објавена од Wales Interactive, која излезе на 15 мај 2025 година за PC, PlayStation 5, Xbox Series X|S и Nintendo Switch.
Истражување со помош на карти
Картите кои ги извлекувате од вашите шпилови претставуваат различни типови на соби, ходници и други елементи и, како што напоменавме, ги користите за да стратешки го ширите светот во кој се наоѓате. Откако ќе заврши фазата на градење, започнува фазата на автоматска борба каде вашиот лик се движи низ креираната зандана, соочувајќи се со проколнатите жители. Паралелно со ова, отклучувате можности за надградба на вашиот шпил, отклучувајќи можности за нови соби и ходници.
Дополнително, низ рушевините ќе сретнувате и ликови инспирирани од шкотскиот фолклор. Ликовите не се толку заинтересирани за вас колку што се заинтересирани за реликвиите кои ги пронаоѓате и кои можете да ги користите за да извлечете уште подобри карти и предмети. Целиот овој систем функционира изненадувачки добро, пружајќи неброени можности за преигрување и експериментирање, давајќи им на фановите на овој жанр неизмерна вредност, особено кога ќе се земат во предвид покомплексните механики.
Into the Restless Ruins црпи длабока инспирација од келтските легенди и шкотскиот фолклор. Поради тоа, доколку сакате играта може да се игра и на шкотски галски јазик!
Враќајќи се на механиката поврзана со создавање простор од карти, одредени простории, како камперски огнови, библиотеки или портали, нудат моќни ефекти и синергии кога се поставени стратешки една до друга. Ова додава длабочина на фазата на градење, барајќи од вас да размислувате однапред како таквиот распоред ќе влијае на претстојната борба. Секој нов ран, односно преигрување, нуди различен распоред на занданата, нови предизвици и потреба од адаптирање на стратегиите. Со текот на времето, можете да отклучувате и модификатори кои значително ги менуваат правилата, наметнувајќи уште покомплексен слој за време на планирањето и битките.
Како што напредувате, предизвиците стануваат сѐ потешки. Рушевините се процедурално генерирани, што значи дека два ранови не можат да бидат исти. Се соочувате со помоќни непријатели и откривате артефакти кои можат драстично да ја предизвикаат вашата стратегија и целосно да ве извлечат од зоната на комфорот. Тензиите се дополнително засилени со суптилните, ретро-инспирирани анимации и драматичната музичка подлога, од која дефинитивно би ги истакнале уникатните нумери поврзани со шкотскиот фолклор.
Into the Restless Ruins нуди свеж и интригантен пристап кон жанрот на roguelike deckbuilder-и, комбинирајќи стратешко градење на лавиринтот со возбудлива автоматска борба. Уникатната механика за креирање на самата зандана низ која ќе се борите, поттикнува длабоко стратешко размислување и експериментирање. Со инспирацијата од шкотскиот фолклор, процедурално генерираните рушевини кои обезбедуваат висока повторливост, можностите за надградба на шпилот и постојаното зголемување на предизвикот, Into the Restless Ruins ветува часови на забава и истражување.
Повеќе детали за играта
- Произведува: Ant Workshop Ltd
- Издава: Wales Interactive
- Жанр: акција, roguelite
- Платформа: Microsoft Windows
- Излезена на: 15 мај 2025
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
