Интернетот му се одмазди на забарот кој го уби лавот Сесил

Гневните интернет корисници се впуштија во потера по американскиот забар Валтер Палмер, како што тој го ловеше и уби од задоволство познатиот зимбабвски лав Сесил. Откако се рашири веста дека Палмер е убиец на 13-годишен лав кој беше туристичка атракција и изучуван од универзитети, интернет корисниците си дадоа задача да му го направат животот пекол на свирепиот стоматолог.

Палмер кој и претходно бил казнуван за нелегален лов на егзотични животни, изврши уште едно нелегално убиство на животно. Бидејќи во националниот парк Хванге е забрането ловење на животни, Палмер употребил мамка за да го извлече Сесил од границите на паркот и го ранил со стрела. Потоа го следел ранетиот лав цели 40 часа за да го убие со пушка од блиску. На крај го обезглави лавот и му ја одрал кожата, најверојатно да му биде трофеј во дневната соба. Палмер платил 55.000 долари за да го убие лавот, пишува BBC, и иако ловењето на лавови е легално во Зимбавбе, треба да се има посебна дозвола од властите.