Google неодамна најави промена на Google Reader која ќе овозможи овој сервис да се интегрира со Google+, a сега постои голема веројатноста дека Google ќе го интегрира Google+ и со платформата за блогирање Blogger, и со тоа да продолжи да ја интегрира друштвената мрежа во сите свои сервиси.
Шпекулациите дека Google ќе го интегрира Google+ во Blogger се потврдуваат преку опцијата Edit User Profile, каде е прикажана порака која предложува Blogger да се поврзе со Google+, и со тоа да се добие пристап до Google+ опциите кои наскоро треба да се појават на Blogger. За жал, можноста да се интегрира Google+ моментално важи само доколку се користи Blogger in Draft, а поширока интеграција ќе биде возможна во наредните неколку недели.
Според официјалниот блог на Blogger, Blogger профилите ќе можат да се заменат со Google+ профили. Контактите кои ги имате во кругови ќе можат да ги гледаат постовите кои сте ги споделиле на вашиот блог.
Доколку сакате да ја испробате интеграцијата, логирајте се на draft.blogger.com и кликнете на Get started. Опцијата да се заменат Blogger профилите со Google+ профили е незадолжителна, па така доколку вашиот блог е под псевдоним и не сакате да го поврзете со вашето вистинско име, не морате тоа да го сторите.
