Подгответе се да се чувствувате постари. Првата продавница за друштвени игри во Македонија, Гоблин, оваа година одбележува јубилејни 25 години од своето основање.
Во овие две и пол децении со Гоблин поминавме низ многу авантури: ги видовме првите современи друштвени игри кај нас, се натпреварувавме на првите гејминг турнири, ги држевме во раце првите игри преведени на македонски јазик, со гордост ги следевме првите домашни Kickstarter кампањи, па дури и малку пишуваа за ИТ.МК. Гоблин е повеќе од продавница, тоа е базата каде што се градеше македонската гејминг заедница.
Роденден во Лабораториум: Фокусот е на дружењето!
Големата прослава ќе се одржи оваа недела, 5 април, во просториите на Лабораториум (од 12:00 до 18:00 часот). За разлика од вообичаените турнири каде владее компетитивен дух, овој пат акцентот е на чиста забава и релаксирано дружење. Секако, бидејќи ова е Гоблин, игрите нема да бидат заборавени – ќе има презентации на најпопуларните наслови, со посебен фокус на игрите на македонски јазик.
А што е роденден без добра атмосфера? За музичкиот избор и ритамот во Лабораториум ќе биде задолжен диџеј Славе, кој ќе се погрижи оваа неделна дружба да биде незаборавна.
Награди за сите!
Ова е веројатно еден од ретките родендени каде славеникот подарува најмногу. Во чест на бројката 25, Гоблин подготви неверојатна наградна игра со над 100 подароци:
- 25 подароци од целиот асортиман на Гоблин;
- 25 специјални роденденски маици за најверните фанови;
- 25 ваучери со попуст за вашата следна омилена игра;
- 25 Magic: The Gathering декови за оние кои сакаат да ја пробаат својата магија.
Зошто не смеете да го пропуштите овој настан?
Ако ви треба дополнителна мотивација, сетете се дека:
- Друштвените игри од Гоблин ве спасија да не „побудалите“ за време на карантините.
- Конечно може да играте сериозни игри на македонски.
- Не мора веќе да чекате со недели за Magic карти од интернет.
- Ќе сретнете луѓе кои го зборуваат вашиот „јазик“ – од Dungeon Masters до стратези за населување на Марс.
Прославата само што започнува!
Овој настан е само почеток. Од Гоблин откриваат дека цела 2026 година ќе биде во знакот на овој голем јубилеј, па подгответе се за уште многу изненадувања во месеците што следуваат.
Затоа, во недела од 12 до 18 часот, откажете сѐ друго. Закажете со друштвото, донесете ги пријателите и покажете им колкав „гик“ сте всушност. Дојдете да наздравиме за поминатите 25 години и за сите нови табли што допрва ќе ги поставиме на маса.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
Web Factory 
