Firefox наскоро би можел да добие уште подобра заштита на приватноста на корисниците. Firefox Private Network е екстензија која ќе овозможи поголема безбедност за корисниците. Засега е во тест фаза и е достапна за корисниците од САД, објави Mozilla на својот блог.
Екстензијата барем во бета фаза е бесплатна, иако најавата е дека „ќе биде бесплатна ограничен период“. Засега е достапна за десктоп верзијата. Она што е важно е дека FPN е исклучиво за прелистувачот, сообраќајот надвор од прелистувачот не е преку VPN и за него ќе треба друга апликација. Брзината при прелистување е нешто пониска, но сепак и повеќе од доволно брза за сите потреби.
Со Firefox Private Network корисниците и понатаму ќе добиваат реклами базирани на локација. Причина за ова е што иако корисникот користи различна IP адреса таа сепак е во близина на локацијата од која доаѓа. Ова не само што значи дека рекламите базирани на локации стигнуваат до корисникот, туку и содржините кои се ограничуваат со геоблокирање се недостапни.
Ако интересот за FPNе доволно голем веројатно Mozilla по излегувањето од бета ќе го направи достапен и глобално.
Firefox Private Network ќе го одбележи и враќањето на „Test Pilot“ програмата на Mozilla.
