Тоpsy Labs, компанија која е специјализирана за анализа на дискусиите на Twitter, пример кои термини се пребаруваат, или кои корисници се влијателни, каков успех има кампањата итн., од неодамна е во сопственост на Apple. Apple плати околу 200 милиони долари, а според извори за Wall Street Journal, зделката не можела да помине без благослов од Twitter, кој уште од 2006-та година му дозволува на Topsy да има пристап до целиот стрим на 500-те милиони твитови дневно.
Како и со секоја аквизиција, Apple останува таинствен за што ќе ја користи компанијата, иако додава дека анализите на Topsy ќе им помогнат за неколку сервиси, како iTunes за музика и филмови, за говорниот асистент Siri и iAD рекламната платформа. Претпоставките се дека Аpple со помош на Topsy ќе може да сугерира и предлага песни преку iTunes Radio, како и предлози за филмови и тв серии за iTunes. Topsy може со анализите да им помогне и на партнерите на Apple кои доставуваат содржина, но и да обезбеди аналитика од друштвената мрежа за iAD кампањите.
Ова е втора аквизиција на Apple во период од само еден месец. Пред две недели Apple го купи израелскиот стартап PrimeSense кој работи со 3Д сензори за препознавање на движење.
