FIFA повторно ќе размислува за видео технологија во фудбалот

Претседателот на FIFA, Сеп Блатер се предомисли и рече дека повторно ќе ја отвори дебатата за воведување на видео технологијата во фудбалот, при тоа извинувајќи се на англиската FA заради грешката на судијата кој не го призна гол за Англија во натпреварот против Германија. Англија загуби 4:1, но доколку се признаеше голот на Лампард ќе беше 2:2 и можеби натпреварот ќе се одвиваше поинаку.

Но судиските грешки не застанаа тука. Само неколку часа подоцна судиите признаа гол од офсајд. Тоа беше првиот гол на натпреварот во кој Аргентина го победи Мексико со 3:1.

Овие два натпревари и секако притисокот од јавноста и голем број фудбалски професионалци ја натераа FIFA повторно да размисли за воведување видео технологија на натпреварите иако претходно официјалниот став на организацијата беше дека технологијата не припаѓа во фудбалот.

„Според досегашново искуство на оваа Светско првенство очигледно е дека ќе биде бесмислено да не го отвориме повторно фајлот за видео технологијата на бизнис состанокот на интернационалниот FA одбор во јули.“ рече г-дин. Блатер.

Според можностите на технологијата на гол линија постојат два система кои се предложени на FIFA. Едниот е Hаwk-Eye, визуелно пратење на топката, систем кој се користи во тенисот, и Cairos Chip-Ball со вметнување на чип во топката.