Корисниците на iPhone често зборуваат за безбедноста на телефоните и оперативниот систем. Со неколку исклучоци оперативниот систем е навистина безбеден, од друга страна општо познато и констатирано е дека Android важи за понебезбеден оперативен систем во споредба со iOS. Можеби поради ова е изненадување кога директорот на безбедност на Google вели дека двете платформи се речиси со исто ниво на безбедност.
„За речиси сите безбедносни закани, нивото на безбедност е речиси идентично на двете платформи.“, вели Адриан Лудвиг од тимот на Google.
Чекор повеќе, г. Лудвиг тврди дека наскоро Android ќе биде побезбеден од iOS. „На долг рок отворен еко-систем како Android ќе биде побезбеден“. Причината за безбедноста на платформата е „Safety Net“, функционалност на оперативниот систем, која скенира 400 милиони уреди секој ден и над 6 милијарди апликации. Резултатите од ова може да обезбедат подобри мерки за безбедност, јави Motherboard.
Новите верзии на платформата секако се безбедни, можностите за злоупотреба на безбедните пропусти на Android 6 и Android 7 се помали од постарите генерации. Сепак бројот на постари уреди е огромен. Најголемиот проблем кој го има Android е бавноста на производителите во издавањето на закрпите за безбедносните пропусти. Досега единствено Nеxus телефоните и Motorola додека беше под Google добиваа надградби навремено.
