Од време на време, со задоволство правиме и краток преглед на игри кои сеуште не се излезени, а ветуваат интересна забава и незаборавни моменти. Во оваа прилика, го разгледуваме Tails Noir спин-оф-от Rebel Rush, како и амбициозната MMORPG игра Ship of Heroes.
Tails Noir: Rebel Rush e откачена автомобилска симулација
Eggnut e развојно студио кое е најдобро познато по Tails Noir серијалот. Во 2019 година, ја објавија бесплатната Tails Noir: Prologue, а во 2021 година ја објавија детективската авантура Tails Noir. Студиото успеа да најде доволно публика за да продолжи да работи и понатаму на овој серијал, произлегувајќи во 2023 година со Tails Noir Preludes. На 16 септември излегува уште една Tails Noir, но оваа игра е значително поразлична од претходните. Tails Noir: Rebel Rushе автомобилска симулација со откачено возење низ надреални локации и правење бројни трикови!
Паркор, но со автомобил!
Во потрага по брзината, Tails Noir: Rebel Rush ќе ви дозволи да се тркате низ постапокалиптична верзија на Ванкувер, да прелетувате преку огромни празнини, од една на друга зграда, да правите најразлични трикови во движење и да барате најразлични кратенки, се со цел да стигнете што е можно побрзо до целта.
Во духот на игрите как Neon White и Trackmania, така и Tails Noir: Rebel Rush е замислена да понуди механики замислени за што е можно побрзо преминување низ мапите (speedrunning). За да играчот успее во целта, ќе може двојно да скока со автомобилот, забрзано да прелетува во одредени моменти и да отскокнува од најразлични површини.
Со 19 стази, Tails Noir: Rebel Rush ќе понуди околу шест часа забава, а ќе чини само 4 евра. Додека го чекате излегувањето на играта, на располагање веќе имате повеќе од одлично демо!
Повеќе детали за играта
- Произведува: Soup with Friends, Eggnut
- Издава: Soup with Friends, Eggnut
- Жанр: симулација
- Платформа: Microsoft Windows
- Ќе излезе на: 16 септември 2024
Ship of Heroes е MMORPG игра која ќе ви дозволи да ги остварите вашите суперхеројски амбиции
Heroic Games Corporation полека го подготвува патот за излегувањето на нивната амбициозна MMO игра со суперхерои. Ship of Heroes ќе ви дозоли да создадете уникатни херои кои ќе користат над 250 моќи. Самостојно или со останатите играчи, ќе можете да уништувате најразлични непријатели кои доаѓаат во најразлични монструозни форми.
Паралелно со ова, ќе можете и да собирате најразлични ресурси, да крафтате или пак да се занимавате со тргување. Надвор од битките, ќе можете и да изнајмувате или да си купите парче земја кое ќе биде лично ваше. Домот можете да го уредувате со најразлични предмети.
Не се знае кога ќе излезе Ship of Heroes, но она што се знае е дека играта ќе бара месечна претплата. За среќа, авторите се удираат во гради и ветуваат дека играта никогаш нема да има ниту премиум изгледи ниту премиум содржини, нити пак продавница за козметички работи или какви било други дополнителни микро трансакции. Се што го има во играта, ќе можете да си го добиете преку играње, а не преку pay-to-win механики. Благодарение на ова, ќе имате само една валута со која ќе можете да купувате сѐ што има на понуда.
Повеќе детали за играта
- Произведува: Heroic Games Corporation
- Издава: Heroic Games Corporation
- Жанр: MMORPG
- Платформа: Microsoft Windows
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
