Денеска стапи на сила огромна пролетна распродажба. На официјалната дигитална продавница на Sony можат да се најдат 1809 игри и додатоци за игри на попуст. Од сите нив, 433 се за PlayStation 5, додека останатите се за PS4.

Во оваа прилика решивме да ги засукаме ракавите, да копаме длабоко и широко и да го извлечеме најуникатното од најевтиното што е на понуда за PS5.

The Solitaire Conspiracy – 57 денари

Се работи за уникатна игра со карти со длабок лор и интригантна приказна. За пофалба е и прекрасната музичка подлога, добрата глума и привлечните визуелни ефекти. Поинтересна и поневообичаена Solitaire не сте играле, верувајте ни!

Shing! – 114 денари

Соло или со уште тројца пријатели, ова е одлична игра во beat-em-up стилот каде играте како нинџа и ставате крај на најразлични демони користејќи импресивни движења, оружја и моќи!

Worms Rumble – Digital Deluxe Edition – 150 денари

За нешто повеќе од два долари ја добивате уникатната игра со крајно симпатичните црвчиња. Делукс едицијата ви ја отклучува и PS4 верзијата на играта, како и бројни изгледи за црвчињата! Ако сакате откачена мрежна игра, тогаш нема да погрешите со Worms Rumble!

Shape of the World – 171 денар

Се работи за една од најрелаксирачките игри што сме ги играле, со хипнотични патувања низ еуфорични шуми, пештери и брегови каде вашите акции влијаат на уникатниот свет на невообичаени и непредвидливи начини.

Hood: Outlaws and Legends – 227 денари

Ако сте љубители на Payday концептот, но од средновековна перспектива, тогаш никако не смеете да го заобиколите овој наслов каде два тима од по четворица се натпреваруваат за да успејат во предизвикувачка кражба. Секој од ликовите има уникатни способности, а за издвојување победа потребна е блиска соработка!

What Remains of Edith Finch – 284 денари

Кратка, но длабока и трогателна приказна за едно исклучително несреќно семејство. Ништо не сакаме повеќе да кажеме, но доколку сте по малку попасивни игри каде само одите, ја впивате атмосферата и се давите во мистериозната приказна, тогаш нема да најдете ништо подобро од What Remains of Edith Finch!

First Class Trouble – 341 денар

Игра која се често нарекува како ААА Among Us. Се работи за интересен спин на целиот жанр каде играчите мора да работат или заедно или еден против друг за да преживеат огромна катастрофа. Напредна графика, музика и гејмплеј механики и понатаму допринесуваат оваа да е исклучително забавен наслов.

Lost in Random – 341 денар

Сите фанови на Алиса во земјата на чудата инстантно ќе бидете вљубени во мрачната атмосфера и сличната тематика која се обработува, особено доколку сте фан на American McGee’s Alice! Феноменална акциона авантура каде се користат уникатни механики на коцка за издвојување победа врз непријателите.

Warhammer: Chaosbane Slayer Edition – 341 денар

Ако сте фанови на Diablo серијалот и сакате малку научно-фантастичен спин на целата формула, тогаш ова е колекција од основната игра заедно со сите проширувања и додатоци. За оваа цена, дефинитивно вреди да навлезете во светот на хаосот со една од 6 класи и бројни вредности на преигрување!

Ride 4 – 426 денари

Се сеќавате ли како за Ride 4 се зборуваше насекаде дека е ултра реалистична на PS5? Со длабок попуст од 85% можете и самите да проверите до кој степен е висока реалноста преку најновата конзола на Sony! Трките се брзи и забавни, а нивото на прилагодување на возилата – крајно високо!

Тоа беа сите десет најуникатни игри кои нема премногу да му наштетат на вашиот буџет, а ќе понудат предолга и, со малку среќа, впечатлива и незаборавна забава! Што би вие купиле од сево ова? Или можеби имате друг предлог?