Шведската финтек компанија Klarna која нуди онлајн финансиски услуги објави дека две третини од корисничките услуги ги обезбедува со вештачка интелигенција. Klarna e и една од првите компании кои го додадоа ChatGPT на својата платформа.
Еден месец откако го додадоа четботот базиран на вештачка интелигенција имаат импресивни резултати. Вештачката интелигенција е достапна на 23 пазари и комуницира со клиентите на 35 јазици. За само еден месец асистентот имал 2,3 милиони разговори со корисниците. Она што може да ги радува компаниите кои сакаат и планираат да го користат, е дека резултатите се барем споредливи како кога клиентите разговараат со луѓе. Вештачката интелигенција би можела да ја зголеми заработката на Klarna за 40 милиони долари вo 2024 година, пишува компанијата на својот блог.
Асистентот кој компанијата го изработи во соработка со Open AI го олеснува купувањето. Ги води корисниците, и им помага полесно да одберат артикли врз база на персонализирани прашања. Системот се користи во различни сегменти во секторот, од помош при купување, до барање за рефундирање и откажувања на порачки.
Klarna тврди дека системот кој сега го користат менува 700 агенти. Ова ќе беше импресивно ако Klarna од некоја причина не одбра да сподели бројка која се совпаѓа со неодамнешните отпуштања. Во мај 2022 година Klarna отпушти 700 вработени, што соодветствуваше на 10% од вкупниот број на вработени во компанијата. Неколку месеци подоцна, во септември, отпуштија уште 100 вработени. Истовремено, финтек компанијата ги замрзна и вработувањата.
Сепак, овие две бројки не се во никаква корелација, тврдат од компанијата. Корисничките услуги на Klarna се поддржани од четири до пет големи компании со над 650 000 вработени. Корисниците на кои им е потребна помош може да одберат да користат вештачка интелигенција или да контактираат агент.
„Одбравме да ја споделиме бројката од 700 за да укажеме на подолготрајните последици од вештачката интелигенција. Веруваме дека е важно да се биде транспарентен за да се создаде разбирање во општеството. Сметаме дека е важно проактивно да се решаваат овие прашања и да се поттикне внимателна дискусија за тоа како општеството може да излезе пред оваа трансформација…“, вели претставникот на Klarna за Fast Company.
Првиот месец огромен успех за вештачката интелигенција на Klarna
Klarna има причина за задоволство. Четботот не само што работи поефикасно, туку работи и подобро. Корисниците се подеднакво задоволни од вештачката интелигенција како и од агентите, но добиваат подобри одговори, за покусо време. Забележале дека корисниците помалку ги повторуваат барањата кога ги поставуваат до вештачка интелигенција, и наместо 11 минути проблемите ги решаваат за само 2 минути. Дополнителна придобивка од користењето на вештачка интелигенција е што е достапна 24 часа и работи 7 дена во неделата.
Бројката од 700 агенти веројатно е најнеумесно одбрана во историјата на вештачката интелигенција досега, но Klarna отвора интересна тема. Корисничките услуги и неколку сродни сектори ќе бидат заменети со вештачка интелигенција. Секторот е затечен поради супер брзиот развој, но компаниите, а веројатно и агентите ќе мора да се прилагодат. Само во САД во 2021 година во кориснички услуги се вработени 2 910 819 луѓе. Во Велика Британија во контакт центрите во 2021 година работеле 812 000 агенти, или 4 отсто од вкупниот број на вработени.
Еден дел од мотивацијата за примена на вештачката интелигенција секако е финансиски, но другиот е и во квалитетот на услугата кој е на страна на вештачката интелигенција. Алатката одговара побрзо на едноставните барања на корисниците. Ова овозможува побрзи одговори и помалку чекање за корисниците, а на агентите ќе им овозможи да се фокусираат на покомплексните барања. Веројатно вештачката интелигенција нема во целост да ги замени корисничките услуги, но тимовите во целост ќе бидат заменети со тимови кои користат вештачка интелигенција.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
