Одбрани подароци за гикови

Ако претходниот предлог беше за љубителите на авио симулации, овој е за љубителите на автомобилизам. Ова не е најевтиниот волан со педали, но е поиздржлив и поквалитетен. Очекувано во овој ценовен ранг не може да очекувате force feedback, но ова не значи дека нема да го направи играњето супер забавно.

Може да се користи со куп игри од Forza, до Need for Speed или Dirt. Дали има попаметен избор за подарок? Веројатно. Дали има позабавен избор за љубители на трки? Тешко!

Слушалки се одличен избор за подарок. Не чинат премногу, а ако успеете да ги погодите димензиите се навистина супер корисни. Bloody G300 на A4Tech се едни од најпознатите гејминг слушалки во буџет класата. Веројатно не може да очекуваме спектакуларна изработка во оваа класа, но слушалките се супер издржливи и удобни. Дефинитивно плус е долгиот и издржлив кабел.

Најважно! Слушалките имаат RBG осветлување што значи дека кои и да го добие подарокот ќе може да се маскира во новогодишен украс!

Паметните часовници веќе не се новитет. Иако најголем дел од нив и натаму се обидуваат да најдат место на пазарот веќе се одличен фитнес и здравствен додаток. Xiaomi Watch S1 Active може да се користи за следење на здравјето со функции како целодневно следење на кислородот во крвта. Поддржува Bluetooth 5.2, A2DP, LE конекција, и GPS (L1+L5), GLONASS, GALILEO, BDS, QZSS за позиционирање. Часовникот има и NFC и е водоотпорен (5ATM), што го прави одличен за активности на отворено. Батеријата е Li-Po 470 mAh и може да работи и недела и пол помеѓу полнењето. Покрај  релативно ниската цена, Xiaomi Watch S1 Active нуди сет на функции што го прават исклучително конкурентен на пазарот на паметни часовници под 200 долари. Сепак, иако работи добро како спорт, фитнес и велнес додаток, не е дизајниран да им конкурира на специјализираните спортски часовници како оние од Garmin или Polar.

Уште еден, овој пат повеќе елегантен, помалку спортски часовник. Smartwatch Xiaomi Watch S1 е супер подарок за љубител на преносен хардвер. Паметниот часовник доаѓа со AMOLED дисплеј од 1,43 инчи, обвиен во елегантна рамка од нерѓосувачки челик од 46 mm. Нуди повеќе од сто режими за следење на фитнес, што го прави фантастична алатка за следење на здравјето. Часовникот доаѓа со Amazon Alexa интеграција и NFC плаќање преку Mastercard. Иако има и недостатоци, Xiaomi Watch S1 е стилски и функционален паметен часовник кој не е премногу скап во споредба со најголем дел од конкуренцијата.

Google Nest Hub е одличен подарок за сите љубители на паметниот дом. Уредот освен што испорачува одличен квалитет на звук е центар на паметниот дом. Овозможува потполна контрола на куп компатибилни уреди.

7-инчниот екран е доволно голем за да овозможи одличен преглед и лесна навигација. Дел од функционалностите се преглед на временските услови, потсетници, аларми или само стрим на омилената музика.

Како и претходниот предлог и Google Nest Mini е одличен подарок за сите љубители на паметниот дом. Овој пат станува збор за компактен, малечок паметен звучник, со одличен квалитет на звук и брзина на процесирање. Nest Mini е изработен од рециклирани материјали, со што е одличен подарок и за еко активистите. Покрај тоа што може да работи како звучник Nest Mini е центар на паметниот дом и може во целост да управува со останатите уреди, да одговора на прашања или да стрима музика преку Bluetooth.

За сите љубители на книгите, нема подобар подарок од Kindle. Kindle е еден од најевтините, ама веројатно и најдобриот таблет кој Amazon било кога го направил. Доаѓа со е-ink екран со резолуција од 300 PPI кој е одличен за читање. Уредот е компактен, лесен и може да се понесе насекаде. Има простор од 16 GB што е доволно да спакувате неколку библиотеки. Благодарение на тоа што екранот не ја оптоварува батеријата таблетот може да се користи навистина долго пред да треба да оди на полнење.

Работата од дома е одлична, ама потребни се барем минимални услови. Еден од овие секако е соодветно биро. Up е еден од најдобрите подароци за луѓето кои никако не може да си пронајдат соодветна работна маса. Масата доаѓа со два електрични мотори и контролер со 4 мемории за помнење на висината. Бојата е целосно прилагодлива, од подлогата, до ногарките.

„Немам место на дискот“ нема да биде прифатлив изговор за оној кој ќе го добие овој подарок. Synology HAT3300-4T HDD е 4TB хард-диск со одлични перформанси. Овој 3,5-инчен SATA диск има капацитет од 4TB и брзина на ротација 5400 RPM. Дискот е тестиран на 300 000 часа работа и има просечно време на расипување (Mean Time to Failure) од 1 милион часа работа! Ова е одличен подарок за сите тек-ентузијасти на кој им е потребна доверлива и брза локација на која може да ги чуваат своите податоци.