Некои игри покажуваат огромен потенцијал уште и пред да излезат, иако обично не можеме да бидеме сигурни до која мера игрите ќе ги оправдаат нашите очекувања. Во оваа прилика, одбравме три интересни игри за кои нашите читатели можеби не се запознаени, а би требало да ги имаат на радарот.
Ad Infernum е акциона хорор игра
Во жанрот со акциони хорор игри, развојното студиото Glass Knuckle Games се има претходно докажано, особено со нивната игра Heliophobia. Во 2018 година, играта успеја до некаде да ги импресионира хорор ентузијастите со мрачната презентација и акциониоте елементи. Ad Infernum ни се чини како следниот логичен чекор и продолжување на она што беше започнато со таа игра.
Од она што забележавме, играта остава впечаток дека ќе има интересна приказна, предизвикувачки загатки, разнолики непријатели, но и импресивен арсенал од ладни и огнени оружја. Дополнително, оружјата можете да ги надградувате за да ги направите поефикасни (побрзо репетирање, поголем капацитет на куршуми, како и зголемена деструктивност).
Низ визуелно импресивните мапи, ќе можете и да собирате најразлични ресурси со кои ќе можете да крафтате нови работи, благодарение на рецептите кои ќе ги откривате. Онаму каде сметате дека директните пресметки не се препорачуваат, ќе можете да се прикрадувате, да бегате од непријателите и да се криете во мракот.
Повеќе детали за играта
- Произведува: Glass Knuckle Games
- Издава: Glass Knuckle Games
- Жанр: хорор акција
- Платформа: Microsoft Windows
- Ќе излезе на: 29 февруари 2024
Cat and Ghostly Road ќе излезе и за конзолите!
Cat and Ghostly Road е игра која ви ја од срце препорачуваме, особено доколку сакате слатки мачки во point-and-click опкружување.
Доаѓајќи од Indie издавачот Sometimes You и Indie развојното студио BOV, Cat and Ghostly Road раскажува впечатлива приказна за тоа како вие, како мачка, ќе треба да спасите човек од сигурна смрт. За да успеете во намерата, ќе започнете опасно патување во свет на духови и демони и ќе стапувате во интеракција со бројни невообичаени ликови.
Патувањето е полно со значајни разговори и решавање квестови како пронаоѓање цвет, барање костурска глава за дух, бркање глувци од стар брод, барање посебен пердув и слични работи. Претпоставуваме дека знаете на што мислиме бидејќи вакви работи се карактеристични за класичните авантури.
Но, Cat and Ghostly Road се истакнува од сите останати бидејќи има посебен визуелен стил, крајно невообичаена приказна, но и ретко видени гејмплеј механики, како можноста за користење посебна визија за забележување на демоните, играње мини загатки (како свирење на флејта, и нешто за што не ви кажуваме, но е поврзано со девојката-мачка. 😊
Кога ќе земете се во предвид, Cat and Ghostly Road се истакнува како преубава, но кратка игра која сведочи за голем труд и љубов. Мачката која е во играта е земена како инспирација на вистинската мачка која девелоперите ја нашле под мост пред 15 години. Додека ја чекате играта да излезе на конзолите, проверете ја PC верзијата на Steam.
Повеќе детали за играта
- Произведува: BOV
- Издава: Sometimes You
- Жанр: стратегија
- Платформа: Microsoft Windows
- Ќе излезе на: 6 март 2024
Quest Master’s Realm ќе биде MMORPG со акција во реално време!
Наспроти првичниот впечаток, Quest Master’s Realm делува како интересна акциона RPG авантура која сака да се рекламира како MMORPG. Играта на Blue Lightning Software ветува бројни квестови кои ќе допринесат да отклучувате и надградувате најразлични вештини и опрема.
Quest Master’s Realm ја започнувате со еден лик, но истиот можете да го прилагодувате и да му наметнувате најразлични улоги. Благодарение на можноста за создавање билдови, лесно ќе можете да скокате низ различни множества од претходно дефинирани способности и опрема.
Борбениот систем остава простор за доработка, а истото би можеле да го кажеме и за одредени анимации и визуелни ефекти. Со оглед на тоа дека играта ќе излезе при крајот на март, има уште малку време за дополнителни доработки, особено доколку играта првично навлезе во раниот пристап на Steam.
Повеќе детали за играта
- Произведува: Blue Lightning Software
- Издава:Blue Lightning Software
- Жанр: ММОRPG
- Платформа: Microsoft Windows
- Ќе излезе на: 29 март 2024
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
