МАНУ објави вебсајт за македонските дијалекти

Дијалект или наречје е разновидност на еден јазик којшто се зборува на одредена географска област. За разлика од литературниот јазик дијалектот не е кодифициран. Најчесто се користи при усна комуникација (говор), а поретко во пишана форма. Овој народен говор претставува духовно културно наследство од исклучително значење. Наречјето има огромно значење за зачувување на традицијата, јазичните и културните специфики на населението во одредена област.

Ако сакате да прочитате и да слушнете за дијалектите во македонскиот јазик Дијалект е веб-страница креирана од Македонската академија на науките и уметностите. Тука може да се пронајдат различните дијалекти на македонскиот јазик, локации каде се зборуваат, може да се чуе и аудио за некои од зборовите, а за сите кои сакаат посериозно да ја разгледуваат оваа област, на страницата се поставени повеќе книги за наречја од различни региони.

Книгите се достапни и за преземање во pdf формат, а ова е и форматот во кој е достапен и најголем дел од содржината. Целата содржина на страницата е поделена во 6 секции. Дијалектни монографии – содржи 8 книги за дијалектите во македонскиот јазик.  Прашалник за собирање на дијалектен материјал – во овој дел е поместена единствено истоимената книга. Текстови од македонските дијалекти – секција во која се поставени повеќе текстови од различни подрачја во кои се говори македонски јазик. Дигитален речник на македонските дијалекти – своевидна база на податоци за дијалектите кои се говорат.

Последните две секции се и најинтересни. Дигиталната мапа на македонски дијалекти е мапа на која може да се пронајдат различни дијалекти. Дел од дијалектите се текст, но за дел има и аудио содржина. Мапата е креирана врз Google Maps, па прилично лесно може да се снајдеме на мапата.

„Мал атлас на македонските дијалекти“ е функционалност со мапа и неколку десетици зборови. Корисникот може да одбере збор и на мапата да ги види дијалектите за овој збор.

Целта на веб-страницата е да се овозможи проучување, заштита и афирмација на македонските дијалекти. Сепак за дел од обичните корисниците може да помогне да се запознаат со богатството на различни дијалекти на македонскиот јазик.