Оваа недела во целост заврши „патот“ на хрватската апликација PhotoMath која од минатата година е дел од Google. Апликацијата оваа недела конечно е издадена на Google профилот на Play Store и на AppStore.
Во февруари 2023 година Google објави дека ја купил хрватската апликација PhotoMath. Еден месец подоцна, откако Европската комисија процени дека купувањето на PhotoMath не е опасност за конкуренцијата за едукативните алaтки купувањето беше завршено. Првата процена беше дека сумата која ја плати Google за PhotoMath е околу 130 милиони евра. Сумата никогаш не беше потврдена, а подоцна се појавија и вести дека цената која ја платил Google е помеѓу 220 и 550 милиони евра.
PhotoMath е едукативна апликација која на корисниците им го олеснува учењето математика. Апликацијата е супер едноставна за користење, и им овозможува на корисниците да фотографираат некој математички проблем со камерата на својот паметен телефон и да добијат не само решение, туку и детално објаснување на чекорите како е дојдено до него. Започна со аритметички операции, дропки, децимални броеви, линеарни равенки, но оттогаш се додадени куп надградби и нови функционалности. PhotoMath има поддршка за алгебра, геометрија, статистика, тригонометрија и делови на математичката анализа (калкулус).
Апликацијата е издадена во 2014 година и има над 300 милиони преземања и оценка од 4,6⭐. Според овие бројки PhotoMath е една од најпопуларните апликации од регионот. Покрај бесплатната верзија PhotoMath има и премиум верзија со претплата од 10 долари месечно или 70 долари годишно.
Google веќе има слично решение како PhotoMath. Google Lens апликацијата има слична функционалност, а и апликацијата Socratic нуди помош при едукација. Google оваа апликација ја купи во 2020 година, пишува 9to5Google.
Што ќе се случува со PhotoMath во иднина барем во моментов е непознато. Функционалноста можеби ќе биде интегрирана како дел во Google Lens. Сепак, PhotoMath веќе има голем број на корисници и на претплатници, па веројатно стандардната верзија на апликацијата ќе продолжи да постои и во иднина.
Појавувањето и развојот на вештачката интелигенција која е специјализирана за решавање на математички проблеми веројатно ќе има влијание и на специјализираните алатки како PhotoMath.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
