2018 се покажа како исклучително профитабилна година во гејмерската индустрија, особено доколку играта се продава на платформата на Valve, Steam.
При крајот на големата летна распродажба, на Steam може да се добие интересен увид за тоа кои се најпродаваните игри во 2018 година. Слично како и претходната година, наместо бројки, Steam ги има класифицирано најпродаваните игри во четири категории. Во првата категорија, Platinum, сосема очекувано го најде своето место PUBG. Интересно е тоа што од ААА игрите кои излегоа годинава се најде само Far Cry 5 и, можеби Jurassic World: Evolution, а златната и сребрената категорија немаа ни една вистинска ААА игра која е излезена во 2018 година. Враќајќи се на најпрофитабилната категорија, исклучително тешко ни беше да поверуваме дека Dota 2 и CS:GO и понатаму вртат одлична заработка. Заедно со нив седи и феноменалната Warframe. Ваквото трио од стари, но бесплатни за играње игри, пркосно сведочи дека квалитетот ги поместува временските граници и создава можности за децениски долга заработка.
Кога сме кај стари игри кои бараат еднократно плаќање за пристап, Grand Theft Auto V и Rainbow Six Siege и понатаму растураат во поглед на финансиските заработки, но поголемиот дел од таквата заработка дефинитивно се должи на агресивните кампањи од микротрансакции. Од поновите игри, особено мило нѝ е што забележавме дека Vermintide 2 добро се продава, но некако се изненадивме што Kingdom Come Deliverance се наоѓа во категоријата Platinum. Ова е игра која не помина воопшто добро помеѓу критичарите и често беше прикажувана како незавршен производ кој ветува многу, но испорачува малку.
Во златната категорија се наоѓа ММО гигантите The Elder Scrolls Online и Black Desert Online, заедно со Final Fantasy XV и Path of Exile: Incursion. Ова нѝ кажува дека интересот за ММО игрите и понатаму е доволно голем, и покрај бројните алчни стратегии кои пробуваат да ги извлечат и последните ваши пари, како излудувачко високите цени во The Elder Scrolls Online или нефер предностите со микротрансакции во Black Desert Online. The Witcher 3: Wild Hunt не одбива никаков пораз и уште една година ја задржува доминацијата во оваа категорија. The Witcher 3: Wild Hunt е некарактеристичен пример за себично задржување на висока цена, дури и откако поминаа неколку години. Но, големите продажби сведочат дека играта навистина вреди секој денар. Divinity Original Sin II е уште еден одличен пример за професионално третирање на базата од фанови и не би можеле да сме посреќни што гледаме дека таквото нешто е позитивно наградено од играчите. За играта, патем, се очекува огромна надградба наскоро. Subnautica, верувале или не, е единствената, баш инди игра, која срамежливо плива со ајкулите како Stellaris и Ark: Survival Evolved.
Интересот за Team Fortress 2 и понатаму е на одредена висина, што е очигледно од сребрената категорија во која се наоѓа, но некако се разочаравме откако забележавме дека тука некаде се наоѓа и феноменалната Nier Automata. Nier Automata е крајно уникатен ААА наслов кој заслужува многу поголеми продажби, затоа што верувајте нѝ кога ќе ви кажеме дека вакви игри се исклучителна реткост и е катастрофална штета што нема повеќе од нив. По се изгледа, гејмерите сакаат да возат најразлични шлепери; во спротивно, не постои причина зошто Euro Truck Simulator 2 и понатаму се наметнува како една од најпродаваните симулации. Кога сме кај квалитетни симулации, Cities: Skylines и понатаму одлично се продава, заедно со бесплатната за играње, War Thunder Project X. Од ААА интересни, но постари класици, доминираат Dying Light, Dark Souls III и Fallout 4. Се верува дека Fallout 4 во последен момент го фати возот на заработка, особено откако беше најавена Fallout 76.
Доколку нè служи добро сеќавањето, минатата година, For Honor се наоѓаше во највисоката категорија, а сега од петни жили се труди да остане во бронзената. Ова е и категоријата во која се наоѓаат повеќето понови ААА игри, како Warhammer 40,000: Inquisitor – Martyr, Ni no Kuni II: Revenant Kingdom, Vampyr, Pillars of Eternity II: Deadfire, Conan Exiles и Bless Online. ММО играта, Bless Online имаше еден од најкатастрофалните почетоци во историјата на ММО игрите и сѐ уште се мачи со одредена неоптимизираност и скршени механики, но тоа не ја спречи да собере доволно пари за да се најде во бронзената категорија. На фронтот со понови, инди игри, се забележува ултра тешката Cuphead, што само сведочи за фактот дека во повеќето од нас тлее исклучително незадоволен мазохист. Тука некаде е и чедото на Offworld Industries, Squad како и феноменалната Stardew Valley.
Од бронзената категорија неуморно мавтаат и евергрин ветераните како Payday 2, Borderlands 2, Terraria, Civilization V, Garry’s Mod, и The Sims 3. Гледајќи ги овие наслови уште еднаш сме потсетени за тоа како квалитетното и безвременското не се ништо повеќе од синоними.
Platinum
PUBG
Rocket League
Dota 2
Far Cry 5
Kingdom Come Deliverance
CS:GO
Warframe
Civilization VI
Rainbow Six Siege
Grand Theft Auto V
Vermintide 2
Jurassic World: Evolution
Gold
Final Fantasy XV
Total War: Warhammer 2
Path of Exile: Incursion
Subnautica
The Elder Scrolls Online
Assassin’s Creed: Origins
Stellaris
Black Desert Online
The Witcher 3: Wild Hunt
Ark: Survival Evolved
Dragonball FighterZ
Divinity Original Sin II
Silver
War Thunder Project X
Nier Automata
Fallout 4
Team Fortress 2
Dark Souls III
Euro Truck Simulator 2
Human Fall Flat
Cities: Skylines
Ghost Recon Wildlands
Frostpunk
Raft
Slay The Spire
Arma 3
The Forest
Dead By Daylight
Dying Light
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
