Дали користењето на видео сервисите даваат пообјективна слика на тоа што се случува на протестите?

Она што го прават мејнстрим медиумите овие неколку дена е најдобар пример зошто не смее да се остави некој да има монопол на информациите – во тој случај секој настан ќе им послужи на политичките и економски центри на моќ во својата пропаганда. Кога ќе постираш видео од толпа од 5 илјади луѓе како ја преплавува „Партизанска“, ниту еден медиум нема да може да излезе со тврдење – десетици граѓани се собраа… – како што имаше обиди на почетокот од протестите.

Каква одговорност чувствуваш кога ги снимаш протестите секој ден? Зошто ги снимаш?

Не знам дали би го нарекол тоа одговорност. Можеби повеќе се работи за некоја болна потреба да се дојде до вистината по секоја цена. Секој има право да дојде до информација од прва рака, нерафинирана, неподесена според нечии потреби.

Дали корисникот користејќи мобилен станува граѓански новинар? Што мислиш за граѓанското новинарство?

Во еден пост http://babamitrajanka.blogspot.com/2011/06/blog-post_09.html апелирав секој да ја искористи технологијата што му стои на располагање за да се спречат сите евентуални сценарија за поттикнување насилство на протестите. Доколку некој забележи сомнителни ликови, најдобро би било да ги фотографира или сними. Ако направат нешто што не треба, потоа, одново, вистината многу лесно ќе исплива на површина. Треба да обезбедуваш информации за да добиваш информации – па според тоа, сите сме новинари – во мигов, многу повеќе одошто (најголемиот дел од) оние што се платени за тоа.

Според тебе како учесник на протестите каква улога одиграа друштвените мрежи на овие протести?

Да не беа социјалните мрежи, особено Twitter, протестите немаше да се случат. Написот од Нетпрес ќе се објавеше, ќе се заклучеше оти се работи за неправда, реакцијата од надлежните веројатно ќе беше идентична и тука ќе завршеше приказната.

Имаш и блог. Дали блоговите одигруваат некоја улога во овие протести?

Чинам дека блоговите одиграа многу важна улога во протестите, исто како и во секој друг аспект од животот. Блогот беше првиот чекор кон децентрализација на информациите на Интернет, блогот останува место кадешто може да се сподели информација, мултимедија, да се пренесе став, мислење, да се погледнат нештата од еден поинаков агол. А, кога идејата е добра, таа секогаш стигнува до публиката.

За крај, какво е твоето размислување за инцидентот кој ги предизикаа протестите и што мислиш дека треба да се смени?

Настаните што ги предизвикаа протестите не смеат да се случуваат во демократска држава. Но, дури и да се случи нешто такво, делото никогаш не смее да биде премолчено, макар и на еден ден. Во денешно време, кога секоја информација стигнува до секое село во светот за неколку секунди, несфатливо е некој да помисли дека ќе сокрие нешто што се случило на преполн плоштад. Исто така е несфатливо што во историјата на независна Македонија никој министер не поднел оставка поради морална одговорност, и покрај тоа што се имаат случено безброј инциденти. Време е нештата да се променат и секој да прифати одговорност за својата работа.