Google објави прва верзија од својата Wallet апликација во која се складираат кредитните картички, и со која може да се плаќа преку паметен телефон, односно преку NFC (Near-field communication) читач. Апликацијата првин беше претставена во мај, а сега е пуштена за користење на сите aмерикански корисници на City Mastercard кредитната картичка.
Најголемиот проблем со кој се соочува Google Wallet е компаниите да ги прифатат компатибилните NFC читачи според нови спецификации кои ќе можат да ја извршат наплатата. Сепак Google најави поддршка од Visa, Discover и Аmerican Express картички, кои заедно со MasterCard, ќе помогнат Wallet да биде корисна апликација и прифатлив начин на плаќање.
Според тоа што може да се прочита, мобилниот паричник е и релативно побезбеден од носење на картичките бидејќи кога eкранот на телефонот се гаси, се гаси и чипот на трансмитерот кој не може да зачувува податоци. Дополнително се внесува PIN секогаш при наплаќање доколку апликацијата не се користи во следните 30 минути.
Идејата за мобилно плаќање е одлична, останува да видиме како Google и финансиските гиганти ќе ја изведат за да може да биде стандард при наплаќањето. Ако не Google, тогаш сигурно некој друг…
