Бројот на пчели на глобално ниво за жал секоја година се намалува. Како дел од причините за намалување на бројот на овие инсекти кои се значајни за природниот еко-систем се наведуваат пестицидите, сушата, уништувањето на животната средината, загадувањето на воздухот, климатските промени. Разочарувачки, сè уште нема научни податоци кои ќе ја претстават целата слика, но според некои експерти како најглавни фактори од сите наведени кои влијаат на изумирањето на пчелите се сметаат пестицидите и уништувањето на животната средина. Eдна третина од популацијата на пчели и пеперутки е во опаѓање, а на 20 отсто од видовите пчели кои се ендемски видови во Европа им се заканува изумирање, вели извештај на Европскиот парламент.
Намалувањето на бројот на пчели и нивно изумирање ќе има влијание на многу фактори, вклучително и животот на луѓето. Дури 78% од дивите цвеќиња и 84% од растителните видови во Европа барем делумно зависат од инсектите за производство на семиња. Опрашувањето со инсекти или други животни, овозможува и поголема разновидност и подобар квалитет на овошјето, зеленчукот, јаткастите плодови и семињата. Иако треба да работиме на отстранување на проблемите кои придонесуваат за исчезнување на пчелите (но и на многу други видови), според трендовите можеби највеќе како човештво работиме на технологија – роботи кои ќе ги заменат пчелите, пеперутките и сите други инсекти кои учествуваат во опрашувањето, наместо да се погрижиме за едноставни работи кои ќе придонесат за намалување на загадување и слични фактори.
Финансискиот бенефит од опрашувањето се проценува на помеѓу 235 и 577 милијарди долари, но ако го имаме в предвид недостигот на храна, вистинската вредност е далеку поголема. Во делови од Кина ситуацијата е толку лоша што некои овошки се опрашуваат рачно, цвет по цвет.
Повеќе од еден проект за креирање на робо-пчели
Последниве десетина години има повеќе тимови истражувачи, па дури и компании кои работат на пчели роботи. Универзитети во Јапонија, Полска, САД, па дури и тимови истражувачи од Walmart работат на технологија која ќе ги замени поленаторите.
И покрај тоа што технологијата е во развој повеќе години, засега нема премногу детали за развојниот стадиум на роботите или конкретни прототипови кои и се достапни на јавноста. Она што го знаеме досега е дека ќе се користат влакна со течен гел за собирање на поленот и опрашување на цветовите. Дроновите ќе доаѓаат со куп сензори, камери и вештачка интелигенција, сами ќе ги пронаоѓаат, и ќе ги оплодуваат цветовите.
Walmart е доста активен на темава
Можеби делува помалку чудно, но најголемиот ланец физички продавници, Walmart е една од компаниите кои работат на некакво решение за опрашување со робот. Компанијата од 2018-та година поседува 6 патенти за дронови за автоматизација на фармите, а еден од овие патенти е токму за дронови кои ќе се користат за опрашување.
Роботите на Walmart во целост ќе ја автоматизираат фармата. Ќе можат да ја проценат штетата и причината за штетата врз посевите, дури ако е потребно ќе можат и да прскаат со пестициди. Еден од шест патенти на дронови за автоматизирање на фармата на Walmart, се робот пчелите. Робо-пчелите ќе доаѓаат со куп сензори, камери, и звучници за сигнализирање; Ќе летаат, од цвет, до цвет, да ги опрашат, а ако треба ќе се вратат назад во станицата на полнење. Целиот процес треба да се одвива автономно без помош од луѓето.
Wyss институтот на Харвард сподели инфо
На задоволство на љубопитните кои ја следат темава, истражувачите на Институтот Вис (Wyss Institute) споделија повеќе податоци за својот проект. Тимот работи на роботи инспирирани од инсектите, кои ќе можат да се користат за опрашување, но и во операции за пронаоѓање и спасување, набљудување, и за следење на временските и климатските услови.
RoboBee тежи помалку од 80 милиграми, распонот на крилјата и е 3 сантиметри, и може да лета со помош на вештачки мускули. Крилцата на роботот мавтаат со брзина од 120 пати во секунда. Идејата е овие роботи да се само-одржливи, автономни, и да можат да се координираат во големи групи. Проектот е во изработка веќе десетина години.
Тимот истражувачи во состав Кевин Ма, Пакпонг Чираратананон, Соер Фулер и Роберт Вуд претстави функционално решение пред десетина години. Сепак главниот недостаток е што за управување, и за електрична енергија за движење, мора да се користи кабел. Моделот имаше единствено визуелен сензор, а за вистинска примена треба да се надминат барем 2 проблеми:
- Роботот е премал дури и за најмалиот микрочип,
- а потребно е и да се пронајде начин за напојување.
Ако се додаде батерија ќе се зголеми тежината на роботот, па ќе биде потребно да се додаде помоќен мотор, кој и самиот ќе биде потежок, со што дополнително ќе се зголеми тежината.
Ако успеат да се надминат проблемите, групи на роботи пчели би можеле во иднина да се користат во операции за пронаоѓање и спасување, и посекако за опрашување на растенија.
National Institute of Advanced Industrial Science од Цукуба, Јапонија
Група јапонски научници од National Institute of Advanced Industrial Science од Цукуба работат на друг проблем – развој на леплив гел. Со помош на гелот со коњски влакна ќе се собира полен и ќе се опрашуваат цветовите. Целата „лепенка“ треба да биде поставена на дрон. Дронот потоа во лет ќе се судира со цветовите и ги опрашува. Тимот веќе имаше еден успешен тест, што претставува прв пат дрон да оплоди цвет вели Еиџиро Миако, кој е лидер на истражувањето.
Лоша вест е што дронот се управува рачно, и досега е тестиран единствено во лабораторија. Тешко е да се поверува дека без вештачка интелигенција ќе може да се користи за запрашување на милијарди цветови.
Технолошки универзитет во Варшава
B-Droid е дрон креиран од Технолошкиот универзитет во Варшава. Треба да се користи како дополнување на природното запрашување кое го прават пчелите. Како што сугерира и името, дронот се однесува како пчела, а со него во целост управува компјутер.
Системот кој го креира тимот од Варшава, му овозможува на корисникот да ги одбере цветовите и да го одбележи реонот во кои сака да ги оплоди цветовите. По овој избор системот автономно лета, ги пронаоѓа, и ги опрашува одбраните цвеќиња во реонот.
Дел од експертите и натаму се скептици и истакнуваат дека опрашувањето со роботи технички, и економски, е неодржливо решение. Дури и ако се пронајде начин со кој роботите ќе можат да се користат на плантажите, проблемот со опрашување на растенијата во дивина останува и натаму. Со тоа останува и проблемот за зачувување на биодиверзитетот и спасување на цели екосистеми кој е далеку поголем.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
