Како освежителен хибрид, Nova Hearts е замислена да понуди уникатно искуство кое е исполнето со мистерија, романса и космички битки. Развиена од студиото Sonderlust, оваа игра амбициозно спојува симулатор за состаноци со елементи на визуелен роман и стратешка борба заснована на потези. Како резултат, добивате забавен продукт исполнет со уникатен визуелен стил, суптилни, но преубави анимации и впечатлив наратив кој целосно ќе ве преземе во втората половина од играта.
Повеќе од летен одмор
Во центарот на приказната е Лус, млада хероина која се враќа во својот роден град, Вермилион, за да избега од проблематичното минато и да ужива во летниот распуст. Меѓутоа, идиличната фасада на градот крие длабоки тајни. Работите добиваат неочекуван тек кога мистериозна космичка сила ќе ѝ подари на Лус и на други атрактивни жители на градот натприродни моќи, претворајќи ги во суперхерои и негативци. Наративот се одвива како визуелен роман, каде што вашите одлуки, донесени преку дијалози и интеракции, директно влијаат на развојот на приказната и односите со другите ликови. Се работи за внимателно напишана приказна која ќе знае како да ве вовлече во уникатниот универзум, под услов да сте спремни да читате километри и километри текст.
допишување + состанок = борба
Гејмплејот на Nova Hearts се темели на неколку клучни столба. Првиот е социјалната симулација, инспирирана од „otome“ игрите. Благодарение на системот, имате можност да градите односи со девет различни ликови, секој со своја личност и приказна. Овие врски можат да еволуираат во пријателство, романса, па дури и ривалство. Комуникацијата се одвива не само лице в лице, туку и преку интерактивен интерфејс на мобилен телефон во играта, каде што можете да разменувате пораки, да ги следите најновите озборувања и да ги зајакнувате вашите моќи.
Вториот столб е стратешката борба. Кога чудовиштата и негативците го напаѓаат Вермилион, играта се префрла на систем на борба на потези. Вие, заедно со вашите сојузници, мора тактички да ги користи вашите космички моќи и да создавате моќни комбинации за да извоите победа. Овој елемент додава длабочина и возбуда, спречувајќи играта да биде само пасивно читање. Но, би сакале да потенцираме дека нема премногу голем предизвик во битките и за брзо време би можеле да „претрчувате“ што е можно побргу низ нив само за да се вратите на најсилната точка во играта – приказната.
Она што ја прави Nova Hearts посебна е нејзината способност хармонично да ги интегрира овие навидум различни механики. Одлуките донесени во социјалниот живот имаат влијание врз борбите, и обратно. Интерактивниот телефонски интерфејс е модерна и интуитивна алатка која го прави светот на играта поживописен и пореален, но, надвор од допишувањето, голем дел од апликациите немаат некаква посебна употреба и се повеќе тука за да создадат илузија на интерактивност.
Кога ќе се земе се во предвид, Nova Hearts е наменета за играчи кои уживаат во игри со богата приказна, развој на ликови и слобода на избор. Ако сте љубител на визуелни романи, симулатори за состаноци или JRPG со полесна стратешка борба, оваа игра нуди голем дел од тоа во еден релативно задоволителен пакет.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
