{mosimage}Бидејќи интернетот во последно време станува сe поинтересен медиум за поголемиот број огласувачи, за сите оние кои планираат рекламирање на интернет, добро е да се знае за што треба да се води грижа за кампањата да биде успешна. Секој потенцијален огласувач треба прво да се праша, која е целта на огласувањето на интернет, бидејќи од тоа ќе зависи и изборот на огласниот формат, креативното решение, медиа планот и буџетот.
Под основна цел на кампањата првенствено се мисли дали се работи за кампања со директен одговор (кампања која има веднаш реакција ) или брендинг кампања. Разликата помеѓу двата пристапа, кога е интернет огласувањето во прашање е што кај директната кампања сакаме личноста која ќе го види огласот (банерот) да кликне на него како би дознале повеќе информации за производот, би оставиле податоци за понатамошна комуникација, или би учествувале во наградна игра и сл., додека пак кај брендинг кампањата главната цел е што повеќе интернет корисници да го видат огласот (банерот), да го забележат името на производот/фирмата/слоганот, но за остварување на целта на кампањата не е неопходно да се кликне на огласот (банерот).
Следниот чекор по утврдување на основната цел на кампањата е донесување на одлука за креативното решение на огласот, кое мора да е прилагодено на целите на кампањата. Тоа значи дека неговиот формат, содржина и визуелизација мора да кореспондираат со основаната цел на кампањата. Многу е важно да се напомене дека комплетното пресликување на креативното решние од другите медиуми на интернет најчесто нема добри резулати, затоа креативата мора да се прилагоди на специфичностите на интернетот како медиум (пред сe интерактивноста) и целта на кампањата. Кога е во прашање форматот на банерот (огласот), стандардниот банер (468×60 пиксели) е погоден за сите видови кампањи; големите формати (skyscraper, rectangle) се добри за брендинг кампањи/корпоративен имиџ; roll-down и floating (летечки) банери се згодни за директни кампањи, бидејќи имаат поголема стапка на клик на банерот (click-trough rate) од стандардните банери. Кај изработката на банерите треба да се води грижа и за содржината.
{mosimage}
Доколку се работи за брендинг кампања доволно е банерот да биде многу едноставен со името на фирмата/производот, слоганот и интернет адресата на страната на фирмата (определен број на корисници ќе ја запомнат адресата и подоцна директно ќе пристапат на веб страната). Ако целта на кампањата е директен одговор, огласот ќе треба да ги содржи покрај погоре набројаните елементи и повик за акција (клик) односно треба на некој начин да ги мотивира посетителите да кликнат на банерот. Тоа најчесто се прави преку повикување за освојување на некоја награда или откривање на одговор на некое интересно прашање.
Кај визуелното решение на банерот многу е важно тоа да биде релативно едноставно и воочливо (контрастно во однос на позадината на интернет страната со јасни рабови), исто така неопходно е да се менуваат секвенци т.е. да се состои од повеќе различни кадри, со што би привлекло внимание.
Уште еден елемент на кој треба да се размисли е содржината после банерот, односно кога потенцијалниот корисник кликне на банерот каде ќе го одведе и кои содржини му се нудат таму? Тука е важно да се напомене дека банерот мора да води директно на веб страната, која се однесува на рекламираниот производ (а не на насловната страна – home page). Ако неможе да се вклучи интернет страната за производот на веб страната на фирмата или пак ако фирмата нема веб страна, тогаш може да се изработи микро сајт, кој би бил посветен на конкретната кампања.
Следниот чекор е да се размисли какви информации и во кој формат треба да му се дадат на посетителот на веб страната како би се постигнала саканата цел. И бидејќи интернетот е пред сe интерактивен медиум, за добри резултати на кампањата, особено ако целта ни е да добиеме одговор, треба да одлучиме на кој начин ќе ја оствариме интеракцијата со посетителите. Интеракцијата може да се оствари преку интерактивни игри/содржини, наградни игри, собирање на желби/мислења за рекламираниот производ/услуга, оставање на лични податоци од интерес за огласувачот итн. Колку повеќе од овие елементи се вклучени толку подобри ќе бидат резлутатите.
Кај изработката на медиа планот на интернет треба да се води сметка за вкупниот број прикажувања на страната на некој веб сајт – тој број покажува колку пати во текот на месецот се отворени страните на одредена страна и воедно го претставува максималниот број на банери кои може да се прикажат на истата. Се проценува просечниот број на страни кои посетителот ги отворил во текот на една посета и колку пати во текот на месецот во просек се посетува една веб страна. Во предвид се зема и бројот на различните посетители месечно. Неопходно е да се одреди на кои интернет страни (или рубрики внатре кај големите веб страни) е најголемата концентрација (процент) на целната група – со што секој закупен банер (оглас) се прикаже со што поголем процент. Медиа планот се изработува врз основа на наведените податоци така да се настојува да се покријат Интернет страните со најголем процент на целната група. Бројот на прикажувањата на одбраната страна се одредува врз основа на вкупниот број прикажувања на таа страна и достапниот буџет, со што се прави оптимална комбинација.
И на крај, кај планирањето на буџетот треба да се води сметка за трошоците на закупот на медиуми, трошоците за изработка/адаптација на креативното решение и евентуалната изработка на микро сајт. Буџетот за закуп на медиуми треба да се прилагоди на креативното решение – ако се работи за нестандардни формати (floating, roll-down, и сл.) потребно е нешто поголем буџет. Буџетот зависи и од големината на целната група на интернет како и саканиот интензитет на кампањата – колку се тие поголеми потребен е и поголем буџет.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
