Kraken Empire е исклучително талентирано развојно студио. Основано во 2011, оваа студио од Сарагоса, Арагон првенствено се има докажано со аркадната акција Kromaia. За брзо време, насловот успева да ги импресионира љубителите на класичните shoot em up игри со вештачката интелигенција која се прилагодува на вашите способности. Неодамна, на 19 септември 2024 година, излезе финалната верзија за популарната и подеднакво храбра игра Toy Tactics!
Импресионирани од ова што го видовме во играта и со голема помош од нашите пријатели од Jesús Fabre успеавме да се поврземе со тимот и детално да поразговараме за многу аспекти поврзани со играта. Првото нешто што сакавме да прашаме беше поврзано со времето. Имено, Kraken Empire постои од 2011 година, а по играта од 2014 срамежливо набљудуваат од сенките цела деценија. Кај отидоа годините?
ИТ.мк: Како големи фанови на Kromaia, со нетрпение чекавме да ја провериме вашата најнова игра Toy Tactics. Дали би сакале да ни кажете што правевте минатава деценија? Навистина ни недостасуваа вашите храбри толкувања на игрите!
Kraken Empire: Ви благодариме! Kromaia ни понуди откачено и незаборавно искуство кое целосно ги тестира нашите технички познавања и вештини. Паралелно со ова, отвори можности за соработка на други проекти што се поврзани со технологијата. Тие проекти долго време го окупираа нашето време.
Во меѓувреме, работевме и на една помала мобилна игра наречена „Hi Score Science“ за CSIC, една од најголемите европски истражувачки институции. Се работи за забавна мала игра дизајнирана да учи природни науки, дозволувајќи ни одлична прилика за да го промениме моментното темпо.
Сега се враќаме со „Toy Tactics“ и навистина ни е мило што повторно правиме нешто креативно и свежо! Ви благодариме што останавте со нас, мака ни беше што долго време не бевме во можност да правиме вакви уникатни игри за вас!
Како што имавте можност да прочитате од нашата рецензија, Toy Tactics е игра која влече силна инспирација од концептот поврзан со минијатурни фигури. Но, освен тоа, девелоперите ни објаснија дека силно биле инспирирани и од желбата да спојат хаотични механики со стратешка длабочина.
Сакавме светот да се чувствува како оживеана детска имагинација, каде војниците-играчки, витези и митски суштества би можеле да коегзистираат на енергично, непредвидливо бојно поле. Визуелниот стил го отсликува тој концепт: шарен, забавен и малку хаотичен, но со доволно транспарентност која особено се истакнува за време на тензичните моменти.
Втората работа која многу ни се допадна беше поврзана со музичката подлога. За овие потреби, авторите сакале да осмислат нешто што ќе пробуди чувства на епски битки, но со лесни пропратни транзиции: „музиката е дизајнирана да одговара на дејството и енергијата на играта и да ја одржува забавна и динамична. Целта беше да се постигне баланс помеѓу разиграната креативност и сериозната стратегија. На крајот на краиштата, не сакавме да се сфати премногу сериозно, вие сепак водите војниците-играчки во битка!“
Ретко имаме видено игра како Toy Tactics. Чедото на Kraken Empire зрачи со некој уникатен потенцијал кој е вешто реализиран и преточен во игрив наслов.
Бевме воодушевени од анимациите, дизајнот и на кампањата и на армиите, како и елементите на физиката/загатките во режимите. Која е вашата тајна? :) Како правите толку многу елементи да се вклопат во една целина која нуди исполнителна забава?
Ви благодариме многу! Не постои магична формула, но многу од тоа се сведува на нашиот фокус на правилно балансирање и одново (и одново) експериментирање и пробување се додека не се дојде до посакуваниот резултат. Уште на самиот почеток знаевме дека Toy Tactics има многу различни елементи: физика, вештачка интелигенција, команди за единиците, тактичка борба, магии, решавање загатки… беше предизвик да направите се да биде вклопено едно-во-друго. Потрошивме многу време за да го рафинираме секое парче за да бидеме сигурни дека сè е кохезивно и забавно. Бројните иновативни идеи допринесоа процесот да трае премногу долго!
Една од клучните работи што ги направивме беше да се осигураме дека клучната механика на цртањето е во срцето на секој елемент, без разлика дали командувате со војска, правите магија, решавате загатка, градите кула или повикувате засилување. Физиката додава слој на непредвидливост, што ги одржува работите свежи. Но, џабе се ова, ако искуството не пружа соодветно задоволство. Нашиот тим работеше неуморно на дотерување на анимациите и физичките интеракции. Како резултат, секоја акција остава впечаток дека е намерна и влијателна.
На крајот, целта ни беше да понудиме беспрекорно искуство каде сè, од војски и магии до тактики и маневри, се чувствува како дел од еден флуиден систем. Клучот е да бидете сигурни дека секоја карактеристика природно ги надополнува другите, без да го преоптоварува играчот. Иако се измачивме, навистина уживавме во ваквите предизвици, особено кога сега гледаме како сè заедно функционира. Се исплати маката.
А, кога сме кај маката, да се мачеле – се мачеле, тоа е повеќе од јасно, особено кога ќе ја земете во предвид механиката за рачно цртање формации. Како што објаснивме во нашата рецензија, Toy Tactics ви дозволува рачно да цртате какви формации да заземат војниците. Ова, ни објаснуваат девелоперите, произлегло од желбата да се пружи на играчите повеќе контрола над бојното поле, на начин на кој би се имала изразита и природна контрола. Авторите сакале да се оддалечат од стандарниот начин на управување со единиците преку едноставното кликнување. Благодарение на новиот свеж концепт, студиото успеало да понуди и тактички интерфејс. Идејата за овој концепт првенствено дошла од бројни книги кои прикажувале најразлични тактики кои се користеле за време на древни битки. „Обично на дијаграмите се прикажани стрелки со маневри за формирање, но откривме дека цртањето форми на формација е поинтересно од цртањето на маневрите.“
„Експериментиравме со тоа како различните форми можат да влијаат на битките. На пример, повлекувањето линија може да ги рашири единиците за одбрана, додека тесниот круг може да создаде огромна офанзива околу непријателот. Идејата беше да им се дозволи на играчите да го преведат своето стратешко размислување во визуелни команди на екранот, правејќи секоја битка да се чувствува лична и динамична.
„Имаше многу обиди и грешки и не беше лесно да се усоврши механиката и да се погрижи дека е, од една страна, забавна и лесна за користење, а, од друга, доволно длабока за да понуди стратешка предност. Нашата цел беше да им дадеме на играчите слобода да експериментираат, без да ја загрозиме достапноста до поголемата публика.
Во моментов, нашиот интерфејс му олеснува на секој да скокне и да си ја проба среќата во жанрот со стратегиите, без разлика на нивното ниво на искуство. Механиката за цртање ги поедноставува работите без да ја жртвува длабочината, дозволувајќи им на играчите да бидат креативни или тактички колку што сакаат. Но, она што е навистина возбудливо е тоа што, за прв пат, им овозможивме на контролорите да бидат остварлива и корисна алатка во една RTS игра. Контролорите сега нудат нов начин да се доживее жанрот и едвај чекаме да видиме како играчите се прилагодуваат на овој нов пристап, особено, како што кажавме, преку конзолите!
Покрај предизвиците поврзани со механиката за цртање, тимот посветил многу време, енергија и нерви на балансирање ем на механиките ем на гејмплејот поврзан со вештачката интелигенција. Морало да се понуди соодветна длабочина при управување со единиците преку цртање формации и при бројните хаотични физички интеракции. Друг предизвик бил поврзан со бројните обиди да се инегрира нивниот уникатен визуелен стил со суптилните анимации.
Сакавме да создадеме свет што ќе се чувствува енергично и живо, да може да понуди задоволувачко и наградувачко искуство, не само во поглед на механиките туку и во поглед на бројните визуелни аспекти. Подразбирливо, беше проблематично да направиме ем да е убава графиката ем да не се загрозат перформансите, особено кога ќе се појават неколку стотици физички единици на екранот.
Од тимот ни објаснуваат и дека не било лесно да се развие задоволително мрежно искуство, особено кога требало да се среди секој од онлајн модовите да работи како што е замислен и да е целосно лишен од проблематични багови. Ова барало да се посвети многу време и темелито да се тестираат бројните аспекти, се со цел да се понуди соодветно искуство во кое секој ќе може да ужива.
Секој предизвик беше можност за учење и секој предизвик ни помогна да ја усовршиме играта и да сме целосно горди на финалниот резултат.
И покрај се, авторите не успејале да ги реализираат сите идеи и планови за играта. Првично, сакале да вметнат и систем за собирање и користење ресурси, како во другите RTS игри. Мислеле дека со ова играта ќе добие одредена длабочина, но на крај, им било страв да не се непотребно искомплицираат работите.
Друга механика со која си игравме беше систем за надградба на единиците, каде играчите можеа да ги подобрат атрибутите како сила, одбрана и агилност. Идејата беше да се додаде слој на длабочина и прогресија, дозволувајќи им на играчите да ги приспособат своите војски и да развијат уникатни стратегии со текот на времето. Сепак, додека го истражувавме овој концепт понатаму, сфативме дека надградбите можат значително да ја искомплицираат играта и тековниот баланс. Стана јасно дека оваа дополнителна сложеност може да го наруши замислените фактори за пристапност и забава.
Исто така, размислувавме да додадеме ленти кои ќе го покажуваат здравјето на нашите единици, нешто што и се бараше од дел од играчите. Сепак, на крајот решивме да не воведеме такви показатели бидејќи фокусот на нашата игра е на креативна стратегија и избегнување на микроменаџмент. Додавањето вакви ленти може да ги наведе играчите да се грижат за здравјето на поединечните единици, наместо да уживаат во целокупното тактичко искуство. Нашата цел е да ја одржиме играта течна и интуитивна, дозволувајќи им на играчите да се концентрираат на извршување на нивните стратегии, а не да им го одвлекуваме вниманието со детална статистика.
Девелоперите ни објаснуваат дека сакале да понудат игра која нема да е непотребно искомплицирана со премногу системи. Секоја одлука што ја донеле била за подобрување на основното искуство и обезбедување целосен фокус на стратегијата и креативноста. „Беше тешко да се отфрлат некои од овие идеи, но веруваме дека тоа беа вистинските одлуки за играта.“
При крајот на нашиот разговор, моравме да ги замолиме авторите да споделат совет-два за сите наши девелопери кои сакаат да започнат кариера во правење игри.
За оние кои штотуку почнуваат да развиваат игри, мојот најголем совет е да останат љубопитни и да продолжат да експериментираат. Не плашете се да пробате нови идеи, дури и ако изгледаат неконвенционални. Развојот на игри е тесно-поврзан со креативност. Најчесто, најуникатните концепти доаѓаат од преземањето ризици.
Фокусирајте се на градење мали проекти, навистина мали, за да ги усовршите своите вештини и да ја разберете механиката што сакате да ја истражите. Овој итеративен пристап ви овозможува брзо да научите и да го примените вашето знаење на поголеми проекти. Соработката со другите исто така може да биде неверојатно корисна; споделувањето идеи и повратни информации може да јаго збогати целото искуство.
И на крај, не заборавајте да се дружите со вашата заедницата. Вмрежувањето може да ги отвори вратите и да обезбеди непроценливи сознанија од други програмери. Останете страстни, бидете упорни и не се откажувајте од вашите соништа. Секоја одлична игра започнува со идеја… и многу напорна работа!
Дали би сакале да споделите уште нешто за вашата игра, тим или некој што ве поддржал низ годините?
Би сакале срдечно да се заблагодариме на сите што не поддржуваа во текот на развојот на Toy Tactics. Нашиот тим вложи толку многу страст во овој проект. Тоа не би било можно без длабока посветеност, напорна работа и креативност. Финалната верзија на играта навистина кажува многу за секој член на тимот.
Огромна благодарност до нашата заедница за корисните повратни информации и константното охрабрување. Вие помогнавте да се обликувате играта во она што е денес. Возбудени сме што сите вие ќе ги искусите Toy Tactics и се надеваме дека ќе ви донесе исто толку радост колку што ни донесе и нас додека ја создаваме. Едвај чекаме да ги видиме стратегиите што ќе ги смислите и приказните што ќе ги споделите. Живели! За авантурата што претстои и за среќното играње!
Тимот од it.mk срдечно се заблагодарува и на сите добри луѓе кои ни дозволија оваа интервју да стане реалност!
